काठमाडौं। विश्व अग्रज दुव्र्यवहार जागरुकता दिवसको अवसरमा एकल महिलालाई विशेष सम्मान प्रदान गरिएको छ।
न्हापांगु पलाः (नेवाः मिसा पुचः)को आयोजनामा आयोजित कार्यक्रममा एकल महिलालाई विशेष सम्मान प्रदान गरेको हो।
प्रमुख अतिथि समाजसेवी एवम् नेपाली कांग्रेस महासमितिका सदस्य सिर्जना सिंहले कीर्तिपुर प्यंगःथांका परम्परागत याकः मिसा (एकल महिला) लक्ष्मीकुमारी सिंहलाई विशेष सम्मान प्रदान गरेकी हुन्, नेवार परम्परा अनुसार ढाकाको खास्टो ओढाई कपडा प्रदान गरिनुका साथै कदर पत्र सहित सम्मान प्रदान गर्ने कार्य भएको थियो ।
त्यसैगरेर, याकः मिसा लक्ष्मीकुमारीलाई पूर्वसभासद् राज्यलक्ष्मी श्रेष्ठले माल्यार्पण गरेककी थिइन । आयोजक न्हापांगु पलाःका अध्यक्ष शिला सायमिले नगद प्रदान गरेर उत्साहमय सम्मान प्रदान गरेकी थिइन् ।
संस्थाका सल्लाहकार एवं नेपाल रेडक्रस सोसाइटीका पूर्वमन्त्री संघरत्न शाक्यले ज्येष्ठ नागरिकलाई संधै सम्मान गर्नु पर्छ, हेयको दृष्टि हेरेमा भविष्यमा आफूले पनि त्यही नियति भोग्नु पर्ने तर्क अघि सारेका थिए।
पूर्वमन्त्री शाक्यले वृद्ध आमा बुबालाई छोडेर विदेश पलायन हुने प्रवृतिलाई लिएर चिन्ता व्यक्त गरे । याकः मिसासंग सम्बन्धित व्यक्तित्व प्रदिप महर्जनले आजभन्दा १६७९ बर्ष अगाडिको प्रसंग उल्लेख गर्दै याकः मिसा पद्मपाणी लोकेश्वर रातोमच्छिन्द्रनाथका प्रियसीको रुपमा रहेको इतिहास प्रस्तुत गरे ।
याकः मिसा रातोमच्छिन्द्रनाथको रथ तान्ने बेला कर्काेटक नागको रुपमा उपस्थित हुने गर्दथे । लोकेश्वरको ३२ वटा लक्षण मध्ये २ वटा लक्षण आफूसंग राखेर याकः मिसा कीर्तिपुरको प्यंगःथांमा विलिन भएकोले उक्त २ वटा लक्षण लिनका निम्ति रथ तान्ने बेला कीर्तिपुरमा गएर फूल प्रसाद चढाउने प्रचलन भएको तथ्य प्रष्ट गरे ।
त्यो बेला देखि हालसम्म याकः मिसाका प्रतिनिधिका रुपमा रुप धारण गर्ने क्रममा निरन्तरता दिने कार्य लक्ष्मीकुमारीले गर्दै आएको जानकारी दिए।
उक्त कार्यक्रममा संस्थाका अभिभावक एवम् सुगत महाविद्यालयका पूवं प्राचार्य तीर्थरत्न शाक्य २० वडाका नसस रसेल श्रेष्ठ, क्वहिति बहालका सर्वसंघका अध्यक्ष आनन्द शाक्य, संस्थाका अभिभावक निर्मल बज्राचार्य, संस्थाको दैनिक भेलामा आवद्ध ज्येष्ठ नागरिकहरु तथा अन्य गन्यमान्य व्यक्तिहरुको उपस्थिति थियो । कार्यक्रम सविना महर्जनले आकर्षक ढंगमा संचालन गरेका थिए ।
प्रकाशित मिति: शनिबार, असार २, २०८० २१:३७
