काठमाडौं। बौद्धिक अपाङ्गता भएका बालबालिकाहरुलाई विशेष शिक्षा प्रदान गर्दैआएको स्वस्थ समाज नेपाललाई विशेष सहयोग गर्ने कार्य भएको छ।
प्राकृतिक उपचारक एवम् सामाजिक अभियन्ता लक्ष्मीनारायण सुवाल परिवारले स्वस्थ समाज नेपाललाई विशेष सहयोग गरेको हो।
काठमाडौंको गोकर्णेश्वर नगरपालिका-४ गोकर्णमा रहेको सामाजिक संस्था स्वस्थ समाज नेपालमा आबद्ध भएका बौद्धिक अपाङ्गता भएका बालबालिकाहरुको यातायात व्यवस्थापनका लागि केही दिनका लागि भएपनि आफू तथा आफ्नो परिवारको तर्फवाट सामाजिक सहयोग गरेको प्राकृतिक उपचारक एवम् सामाजिक अभियन्ता लक्ष्मीनारायण सुवालले बताएका छन्।
विगत १० बर्षदेखि निरन्तर बौद्धिक अपाङ्गता भएका बालबालिकाहरुको विशेष शिक्षा तथा उनीहरुको लागि डे–केयर सुविधा दिने कार्य स्वस्थ समाज नेपालवाट हुंदैआएको संस्थापक अध्यक्ष सीता श्रेष्ठले जानकारी दिएकी छन्।
अध्यक्ष श्रेष्ठका अनुसार, बौद्धिक अपाङ्गता भएका बालबालिकाहरुलाई निःशुल्क डे–केयर सुविधा तथा उनीहरुलाई विशेष शिक्षा दिने कार्य स्वस्थ समाज नेपालवाट भैरहेको छ।
जसवाट बौद्धिक अपाङ्गता भएका १८ बालबालिकाका अभिभावकहरु दिनभर काम गर्न जान पाएका छन्। रोजीरोटी चलाउन पाएका छन्। जसका कारण ती बौद्धिक अपाङ्गता भएका बालबालिकाका अभिभावकहरु खुशी देखिन्छ। उनीहरुले स्वस्थ समाज नेपालका संस्थापक सीता श्रेष्ठलाई धेरै धेरै धन्यवाद तथा आभार व्यक्त गर्न चुक्दैनन्।
संस्थापक अध्यक्ष श्रेष्ठ तथा संस्थाका सदस्यहरुको सहयोग अनि लक्ष्मीनारायण सुवाल जस्ता धेरैभन्दा धेरै मनका धनी शुभेच्छुकहरुको सहयोगले स्वस्थ समाज नेपाल चलिरहेको संस्थाले जनाएको छ।
यसो भएतापनि बेलाबखत चरम आर्थिक संकटमा पर्ने गरेको संस्थालाई यतिखेर संस्थामा आवद्ध बालबालिकालाई निःशुल्क घरवाट संस्थामा र संस्थावाट घरमा ल्याउने–लैजाने यातायात खर्च व्यहोर्न निक्कै कठिनाइ हुदैआएको छ।
यातायात खर्च मात्र मासिक ४० हजार पर्ने गरेको जानकारी अध्यक्ष श्रेष्ठले दिएकी छन्। त्यसको अलावा ती बालबालिकालाई दिवा खाजा लगायतका खर्चले पनि संस्थालाई पिरोलिएको छ।
तपाईहरुले पनि प्राकृतिक उपचारक लक्ष्मीनारायण सुवालले जस्तै सहयोग गर्न चाहनुहुन्छ भने, मोबाइल नंबर 9841958266 मा सिधा सम्पर्क गरेर सहयोग गर्न सक्नुहुन्छ ।
तपाईहरुको सानो सहयोगले पनि बौद्धिक अपाङ्गता भएका बालबालिकाको स्तरोन्नतिमा ठूलो सहयोग मिल्ने संस्थाले भनेको छ।
प्रकाशित मिति: सोमबार, भदौ ११, २०८० २०:२०
