काठमाडौ । नेपाल कम्युनिष्ट पार्टी (माओवादी केन्द्र) परित्याग गर्ने ३ प्रमुख, ६ उपप्रमुखसहित १४ स्थानीय तहका पदाधिकारीको पद गुमेको छ ।
माओवादी केन्द्रबाट निर्वाचित भएर नेकपा (एमाले) मा प्रवेश गरेका ती जनप्रतिनिधिको पद रिक्त भएको हो ।
निर्वाचन आयोगले दल त्याग तथा पद रिक्ततासम्बन्धी प्रकाशन गरेको सूचनानुसार उनीहरु माओवादी केन्द्रका तर्फबाट विस २०७४ को स्थानीय तहको निर्वाचनमा निर्वाचित जनप्रतिनिधि हुन् ।
पद रिक्त स्थानीय तहका पदाधिकारी र सदस्यमा रौतहटका ७, कैलालीका ४ तथा ओखलढुङ्गा, महोत्तरी र सिरहाका १/१ जना जनप्रतिनिधि रहेका छन् ।
एमालेमा प्रवेश गरी माओवादी केन्द्र परित्याग गरेकाले उनीहरु निर्वाचित भएको पद स्वतः रिक्त हुने प्रावधान बारे आयोगको ध्यानाकर्षण गर्दै माओवादी केन्द्रले त्यससम्बन्धी सूचना प्रकाशन गर्न पत्राचार गरेको थियो ।
आयोगको बुधबारको निर्णयले राजनीतिक दलसम्बन्धी नियमावलीबमोजिम निजहरुले दल त्याग गरेकाले निर्वाचित पद स्वतः रिक्त रहने जनाउँदै सूचना प्रकाशन गरिएको हो ।
प्रकाशित मिति: शुक्रबार, असार ११, २०७८ २१:२१
