रुपन्देही । कोभिड-१९ को नयाँ भेरिएन्ट नेपालमा देखिएसँगै स्वास्थ्य मन्त्रालयले नेपालका स्वास्थ्य संस्थाहरुलाई सर्तकता अपनाउन निर्देशन जारी गरेको छ।
नयाँ भेरियन्ट ‘जेएन-१’ भन्दा बढी संक्रामक हुनसक्ने भएकाले सतर्कता अपनाउनु पर्ने जनस्वास्थ्य विज्ञहरूले चेतावनी दिदै आएका छन्। छिमेकी मुलुक भारतमा कोभिड-१९ नयाँ भेरिएन्टको संक्रमण बढ्दै गएको र यात्रुहरुसँगै यो संक्रमण नेपाल भित्रिने सम्भावना उत्तिकै रहेको छ।
कोभिडको महामारीमा नेपाल-भारतको सीमा बेलहियामा देखिएको चुस्तता अहिले सुस्त भएको छ। सीमामा हुनुपर्ने परिक्षण अहिले निकै कम भएकोमा स्वास्थ्यकर्मीहरुकै चिन्ता बढेको छ।
बेलहिया हेल्थ डेस्कको तथ्यांक अनुसार मंसिर महिनामा ८ सय २५ जनाको कोभिड परिक्षण गरिएको थियो । त्यस मध्ये एक जनामा पनि संक्रमण देखिएको थिएन।
तर पुस महिनामा ९ सय ९६ जनामा गरिएको परिक्षणमा २ जना भारतीय र १ जना नेपाली गरि ३ जनामा संक्रमण देखिएको थियो। तथ्याङ्कमा हेल्थ डेस्कमा परिक्षण गरेको उल्लेख भए पनि स्थलगत अवलोकनको क्रममा भने हेल्थ डेस्क सुनसान देखिने गरेको छ।
स्थलमार्ग हुदै नेपालमै सबैभन्दा बढी पर्यटक भित्र्याउने यो नाकामा कोभिड परिक्षण नाम मात्राको हुने गरेको छ। बाह्र जनाको दरबन्दी रहेको बेलहिया हेल्थ डेस्क अहिले गैरसरकारी संस्थाहरुको कर्मचारीको भरमा मात्र सञ्चालनमा रहेको छ।
प्रदेश सरकारको स्वास्थ्य निर्देशनालय मातहत रहेको हेल्थ डेस्कका स्वास्थ्यकर्मीको कार्तिकसम्म मात्र करार सम्झौता रहेको थियोे। त्यस यता कर्मचारीहरुले तलब नपाउँदा डेस्कको काम प्रभावित भएको छ।
तलब नपाएकै कारण चिकित्सक सहित ३ जनाले राजीनामा दिएका छन्। भएकाहरु पनि बस्ने कि जाने भन्ने दोधारमा रहेका छन्। हाल ५ जना अहेब, २ जना ल्याब टेक्निशियन र ३ जना कार्यालय सहयोगी बेतलबी काम गरिरहेका छन्।
सेभ द चिल्ड्रेन र किड्स नेपालका २/२ जना कर्मचारी पनि यस डेस्कमा रहेको भेक्टर कन्ट्रोलर साहले बताए।
उनले संक्रमण देखिएकालाई पनि व्यस्थापन गर्ने कार्य फितलो रहेको बताए । यसले नयाँ कोभिडको नयाँ भेरियन्ट फैलिने सम्भावना अझै रहेको बताए।
रुपन्देहीका प्रमुख जिल्ला अधिकारी गणेश अर्यालले नेपालमा पछिल्लो समय ३ जनामा संक्रमण देखिएपछि चेकजाँचमा कडाई गरिएको दावी गरे। प्रमुख जिल्ला अधिकारीले चेकजाँचको दावी गरिरहँदा भने बेलहिया हेल्थ डेस्कको खाली कुर्सीहरुले यो दावीलाई गिज्याईरहेको थियो।
प्रकाशित मिति: मंगलबार, माघ २, २०८० १७:४८
