उदयपुर । उदयपुरको चौदण्डीगढी नगरपालिका–५ स्थित त्रियुगा नदीको शिवाई–बेल्हा जोड्ने भाँचिएको पुलमुनि नुहाउने क्रममा एक व्यक्ति डुबेर बेपत्ता भएका छन् ।
इलाका प्रहरी कार्यालय बेल्टारका प्रमुख इन्सपेक्टर बबिन राईका अनुसार भाँचिएको पुलमुनि नुहाउने क्रममा चौदण्डीगढी नगरपालिका–६ कालीखोलाका ३० वर्षीय सुरज राई सोमबार साँझ बेपत्ता भएका हुन्। इन्सपेक्टर राईका अनुसार बेपत्ता भएका राईसँगै स्थानीय सुरेश माझी र प्रताप राई पनि सोही स्थानमा नुहाउन गएका थिए ।
इन्सपेक्टर राईले भने, ‘भाँचिएको पुलको स्ल्याबमुनि भुमरी परेर ठुलो खाल्डोजस्तो देखिन्छ । त्यहीँ डुबेर बेपत्ता भएको हुन सक्छन्। हामीले खोजी गर्दा भेटेका छैनौँ । अहिले सशस्त्र प्रहरीको गोताखोर टोली बोलाएका छौँ ।’
प्रकाशित मिति: मंगलबार, असार २४, २०८२ ०७:५१
