काठमाडौं । नेकपा एमालेको विधानबाट ७० वर्षको उमेर सीमा र कार्यकारी पदमा दुई कार्यकालको सर्त हटाउने निर्णय पार्टीको केन्द्रीय सचिवालय बैठकले गरेको छ ।
यससँगै केपी शर्मा ओलीलाई तेस्रो पटक अध्यक्ष बन्ने मार्ग खुला भएको छ । बुधवार पार्टी मुख्यालय च्यासलमा करिब १० घण्टासम्म चलेको सचिवालय बैठकले यो सहमति जुटाएको हो । सचिवालयले पार्टी पदाधिकारीको संख्या १५ जनामा सीमित गर्ने सहमति पनि गरेको छ ।
त्यस्तै, अब सचिवालय संरचना हटाएर पदाधिकारीहरूलाई नै स्थायी कमिटीको रूपमा व्यवस्थित गर्ने प्रस्ताव अघि सारिएको छ । केन्द्रीय कमिटीको संरचना पनि परिवर्तन गर्दै २५१ सदस्यीय बनाउने प्रस्ताव पेश भएको छ ।
विधान संशोधन कार्यदलका संयोजक उपाध्यक्ष विष्णु पौडेलले प्रस्तुत गरेको प्रस्ताव संशोधनसहित पारित भएको उपमहासचिव प्रदीप ज्ञवालीले जानकारी दिए । अब सचिवालय बैठकबाट अघि बढाइएको यो मसौदा शुक्रबार बस्ने पोलिट्ब्युरो बैठकमा प्रस्तुत गरिनेछ । त्यसपछि केन्द्रीय कमिटी बैठकबाट अनुमोदन गरी भदौमा तय गरिएको विधान महाधिवेशनमा पेस गरिनेछ ।
पार्टी विधानमा रहेको उमेर सीमा र कार्यकाल सिमाका विषयमा यसअघि तीव्र मतभेद देखिएको थियो । तर पछिल्लो सहमतिले पार्टी नेतृत्वमा निरन्तरता दिन चाहनेहरूलाई सहज भएको छ ।
एमाले पोलिटब्युरो बैठक आज
नेकपा एमालेको पोलिटब्युरो बैठक आज दिउँसो १ बजे बस्ने भएको छ । बैठकमा पार्टी विधान संशोधन सम्बन्धी प्रस्तावमाथि गहन छलफल हुने एमाले सचिव योगेश भट्टराईले बताए ।
यसअघि बिहीबार बसेको केन्द्रीय सचिवालय बैठकले विधानमा उल्लेखित ७० वर्षे उमेर सीमा र कार्यकारी पदमा दुई कार्यकालको सीमा हटाउने प्रस्ताव अघि सारेको थियो ।
विधान संशोधनको प्रस्ताव उपाध्यक्ष विष्णु पौडेलले पेस गरेका थिए। प्रारम्भिक प्रस्तावमा पदाधिकारी संख्या ११ रहेको भए पनि छलफलको क्रममा संख्या बढाएर १५ जनामा सीमित गर्ने सहमति जुटेको भट्टराईले बताए ।
साथै, केन्द्रीय संरचना र पदाधिकारी व्यवस्थापनमा परिवर्तन गर्नेसम्बन्धी प्रस्तावहरू पनि पोलिटब्युरोमा प्रस्तुत गरिने बताइएको छ । पोलिटब्युरोबाट पारित भएपछिको चरणमा संशोधन प्रस्ताव केन्द्रीय कमिटी बैठकमा पेश गरेर भदौमा तय गरिएको विधान महाधिवेशनमा अनुमोदनको लागि लगिनेछ। एमालको केन्द्रीय कमिटी बैठक ५ गते बस्दैछ।
प्रकाशित मिति: शुक्रबार, साउन २, २०८२ ०७:५७
