काठमाडौं । आज देशैभर जेन-जी युवाहरूले गरेको प्रदर्शनका क्रममा अहिलेसम्म १८ जनाको मृत्यु भएको छ भने २ सय ५६ घाइते भएका छन्।
काठमाडौंमा मात्र भएको प्रदर्शनको क्रममा १६ जनाको मृत्यु भएको छ भने उपत्यका बाहिरका प्रदर्शनमा २ जना को मृत्यु भएको स्वास्थ्य मन्त्रालयले जानकारी दिएको छ।
अहिलेसम्म ट्रमा सेन्टरमा मृत्यु भएका ३ जना मृतकहरूको मात्रै सनाखत भएको छ। अस्पताल स्रोतका अनुसार, अहिलेसम्म ट्रमा सेन्टरमा मात्रै ९ जनाको मृत्यु भइसकेको छ । जसमध्ये ३ जनाको नाम प्राप्त भएको हो।
यसरी मृत्यु हुनेहरूमा ग्लोबल कलेजमा अध्ययनरत श्रीराम चौलागाईं, बाँकेका २१ वर्षीय सुलभ राज श्रेष्ठ र कीर्तिपुर बस्ने ४२ वर्षीय बुद्धि बहादुर तामाङ रहेका छन् ।
त्यस्तै अन्य ५ जनाको भने सनाखत हुन बाँकी भएको ट्रमा सेन्टरका एक चिकित्सले बताएका छन् । उपत्यकाका विभिन्न अस्पतालमा मृत्यु हुनेको संख्या १६ पुगेको छ ।
मृत्यु हुनेहरूमा सिभिल अस्पतालमा ३, केएमसी अस्पतालमा १, त्रिवि शिक्षण अस्पतालमा १ र एभरेष्ट अस्पतालमा ३ जना जना प्रदर्शनकारीको मृत्यु भएको छ भने उपत्यका बाहिर विराटनगर प्रदर्शनमा पनि २ जनाको मृत्यु भएको छ ।
सरकारतर्फको क्षतिको विवरण भने अहिलेसम्म प्राप्त भएको छैन । अहिले काठमाडाे जिल्ला प्रशासनले राती १० बजेसम्म कुनैपनि स्थानमा भेला, धर्ना, जुलुस, प्रदर्शन गर्न नपाउनेगरी कर्फ्यु जारी समेत गरिसकेकाे छ ।
प्रकाशित मिति: सोमबार, भदौ २३, २०८२ १८:३३
