काठमाडाैं । महानायक राजेश हमाल र पाकिस्तानका पूर्व परराष्ट्र मन्त्री जलिल अब्बास जिलानीबीच बिहीवार काठमाडौंस्थित पाकिस्तानी दूतावासमा भेट भएको जानकारी उनले आफ्नो फेसबुक पेजमार्फत दिएका छन् ।
भेटबारे जानकारी दिँदै उनले भनेका छन्, “मेरा बुबाले प्रमाणपत्र बुझाउँदादेखि उहाँ बित्दासम्म श्री जिलानी साथमा हुनुहुन्थ्यो ।” महानायक भन्छन्, पूर्व परराष्ट्र मन्त्री जलिल अब्बास जिलानीसँग भेट्दा धेरै खुशी लाग्यो । “यो अवसरका लागि पाकिस्तानका महामहिम राजदूतलाई धन्यवाद । श्री जिलानीसँगको भेटले बुबासँगको सम्बन्धमा केही राहत दिलायो,” हमाल थप्छन् ।
भेटका केही तस्वीर सार्वजनिक गर्दै, दूतावासमा नेपाली राष्ट्रिय झन्डासँगै राखिएको पुस्तिकामा भेटबारे केही लेखिरहेको पनि देखिन्छ । हमालका पिता स्वर्गीय चुडाबहादुर हमाल पाकिस्तानका राजदूत रहँदा हृदयघातका कारण निधन भएको थियो ।
राजदूत हमालका अन्तिम क्षणका साक्षी जलिल अब्बास जिलानीले हमाल ढलेपछि अस्पताल पुर्याउनेदेखि नेपालसम्म शव ल्याउन सहयोग गरेका थिए । बुबासँग अन्तिम समयमा बोलचाल नभएको विषय हमालका लागि पीडादायी स्मृति बनेको उल्लेख गर्दै राजेश हमालले भेटमा निकै भावुक संवाद गरेको उल्लेख गरेका छन् ।
हमालले केही समयअघि पोखरामा आफ्नो पुस्तक युगदेखि युगसम्म को डिस्कस प्यानलका क्रममा पत्रकार त्रिपाठीको एक प्रश्नको उत्तरमा पनि परिवारसँगको सम्बन्ध सहज नभएको बताएका थिए ।
प्रकाशित मिति: शनिबार, मंसिर १३, २०८२ १६:५७
