काठमाडाैं । आज जनकपुरबाट काठमाडौं जाने बुद्ध एयरलाइन्सको फ्लाइट यु४-५०६ मा प्राविधिक समस्या देखिएपछि उडान ढिलाइ हुँदा यात्रुहरूले असहजता महशुस गरेका छन् ।
७२ सिट क्षमताको उक्त जहाज दिउँसो १:४० बजे उडानको तयारी गरिरहेको थियो, तर टेक्निकल कारणले पाइलटको दोस्रो प्रयासमा पनि जहाज उडानमा जान सकेन । ग्राउन्ड स्टाफले यात्रुहरूलाई क्रिटिकल इरर जनाउँदै केही समय पर्खिन अनुराेध गरेका थिए ।
समयमै एयरपोर्ट पुगेका यात्रुहरू रिसेड्युल र जहाजमा बस्दा उत्पन्न असुविधाबाट निराश भएका थिए । साना बालबालिका बोकेर आएका यात्रुहरू विशेष गरी तनावपूर्ण अवस्थामा देखिएका थिए। केही यात्रुहरू जहाजमा बस्दा डरका कारण अस्वस्थ भएको अनुभव गरेका थिए ।
ग्राउन्ड स्टाफका अनुसार, काठमाडौंबाट अर्को जहाज पठाइने तयारी भइरहेको थियो । करिब आधा घन्टा प्रतीक्षापछि अर्को जहाज जनकपुरमा अवतरण गरेको थियो । त्यसपछि फ्लाइट अन्ततः ५:३० बजे काठमाडौंका लागि उडान भरेको थियो । यात्रुहरू सुरक्षित अवतरणपछि आफ्नो गन्तव्यतर्फ प्रस्थान गरेका छन् ।
बुद्ध एयरलाइन्सकै सिमरा–काठमाडौं उडानमा इन्धन लिकेज समस्या आएको थियो र यात्रुहरूलाई अर्को जहाजबाट काठमाडौं पठाइएको थियो । यसले एयरलाइन्सको प्राविधिक तयारी र सेवा प्रणालीमा प्रश्न उठाएको छ ।
विशेषज्ञहरूका अनुसार, प्राविधिक समस्या समाधान नगरे यात्रुहरूको विश्वासमा असर पर्न सक्ने सम्भावना रहेको छ । यसैले एयरलाइन्सले यात्रुहरूको सहज र सुरक्षित यात्रा सुनिश्चित गर्न तत्काल सुधारात्मक कदम चाल्नु आवश्यक रहेकाे जानकारहरुकाे भनाइ छ ।
प्रकाशित मिति: शुक्रबार, फागुन ८, २०८२ २०:४७
