काठमाडाैं । नेपाल सरकार यानी बालेन सरकारका नामवाट निक्कै नै ख्याति कमाएको वर्तमान सरकारका मन्त्रीहरुले सम्पत्ति विवरण सार्वजनिक गर्दा बढी मात्रामा सुनकै कुरा आएको छ। सवै मन्त्रीहरुको सम्पत्ति विवरणमा सुनकै मात्रा अधिक रहेको छ।
सार्वजनिक भएको विवरण अनुसार बहालवाला प्रधानमन्त्री बालेन शाहसँग १ सय ९० तोला सुन छ । त्यसैगरी गृहमन्त्री सुदन गुरुङको सुन ८९ तोला, अर्थमन्त्री डा. स्वार्णिम वाग्लेको ४५ तोला, परराष्ट्रमन्त्री शिशिर खनालको २२ तोला, ऊर्जामन्त्री विराजभक्त श्रेष्ठको १५ तोला सुन भएको सम्पत्ति विवरण आएको छ ।
त्यस्तै भौतिक पूर्वाधारमन्त्री सुनिल लम्सालको ३०, कानुनमन्त्री सोबिता गौतमको १५ तोला, महिलामन्त्री सीता वादीको १८ तोला, सामान्य प्रशासनमन्त्री प्रतिभा रावल २५ तोला, स्वास्थ्यमन्त्री निशा मेहताको ३० तोला, शिक्षामन्त्री सस्मित पोखरेलको २५ तोला, पर्यटनमन्त्री खड्कराज पौडेलको ११ तोला, सञ्चारमन्त्री डा. विक्रम तिमिल्सिनाको १९.५ तोला र कृषिमन्त्री गीता चौधरीसँग ९ तोला सुन छ । उद्योगमन्त्री गौरीकुमारी यादवको १८० तोला र श्रममन्त्री रामजी यादवको ८० तोला सुन रहेको विवरणमा उल्लेख छ ।
यस विवरणले पनि ‘हाई प्रोफाइल’ व्यक्तिहरूले जम्मा गर्ने सम्पत्तिमध्ये सुन उच्च प्राथमिकतामा पर्ने गर्छ भन्ने कुरालाई प्रमाणित गरेको छ । उच्च तहका व्यक्तिले घरजग्गा र सेयरपछि सुनमा लगानी गर्ने गरेको यो विवरणले पनि प्रष्ट पारेको छ। अचल सम्पत्तिमा घरजग्गा पछि सुनलाई गणना गर्ने गरिन्छ। यस हिसावले सुन जोड्नुलाई स्वभाविक मान्न सकिन्छ । यसो भन्दैगर्दा पनि धेरैको ध्यान यसरी जोडिएका सुनको स्रोत के हो त भन्ने कुरा आउनुलाई अस्वाभाविक भन्न मिल्दैन । सरकारमा रहेका बहालवाला मन्त्रीहरुले स्पष्ट रुपमा स्रोत पनि उल्लेख गरेको भए, यस कुराले उच्च प्राथमिकता पाउने नै थिएन ।
कुनैपनि सम्पत्ति जोडजाड गर्नु भनेको नराम्रो कुरा अवश्य होइन । आफ्नो र परिवारको भविष्यको लागि सुरक्षा कवच पनि हो । भविष्यलाई मध्यनजर गरेर सुनको जोडजाड गर्नुलाई नराम्रो भनिनु हुदैन। सरकारमा नआउंदै विभिन्न जीविकापार्जोनका व्यवसाय पेशावाट या पैत्रिक सम्पत्तिवाट के कसरी जोडिएका हुन भन्ने स्पष्ट रुपमा स्रोत खुलाउनु आवश्यक छ।
यो आवश्यकतालाई कतिपय मन्त्रीहरुले मतलब नगरेको कारण यस्तो होहल्ला आएको मात्र हो। सुनचाँदी तथा धनसम्पत्तिका धनाढ्य मन्त्रीमण्डलका सदस्यहरु कोही पनि गरिब नदेखिएको कारण उनीहरु कोही पनि लोभ–लालच र पैसा कमाउन भ्रष्टाचारमा लाग्दैन होला भन्ने सवैको सोच रहेको छ।
सवैको यही सोच र चाहनालाई अघि बढाउनका लागि वर्तमान बालेन सरकार निडरकासाथ अघि बढ्नु र बढाउन आवश्यक छ। भ्रष्टाचार नगर्ने र नगराउने अनि भ्रष्टहरुलाई छानी छानी कारवाही गर्ने मूल उदेश्यका साथ बनेको यो सरकारले सवै कुरामा पारदर्शिता ल्याएर आफ्नो सक्षमतालाई प्रदर्शन गर्नु र गराउनु पर्दछ। नामी साप्ताहिककाे सम्पादकीय
प्रकाशित मिति: शनिबार, वैशाख ५, २०८३ ०७:५०
