म्याग्दीको अन्नपूर्ण गाउँपालिका-६ मा रहेको प्रमुख पर्यटकीयस्थल घोडेपानी-पुनहिलमा पर्यटकीय पूर्वाधार विस्तार भएको छ।
चालु आर्थिक वर्ष २०८२/८३ मा अन्नपूूर्ण गाउँपालिकाले बिनियोजन गरेको रु. २७ लाख र गण्डकी प्रदेश सरकारको ५ लाख बजेटबाट साइकल मार्ग, पदमार्ग, सार्वजनिक शौचालय, बसपार्क निर्माण भएको हो ।
पुनहिल–घोडेपानी क्षेत्रको पर्यटन पूर्वाधार विस्तारका लागि बजेट बिनियोजन भएका पाँच वटा योजना सम्पन्न भएका वडा कार्यालयले जनाएको छ।
घोडेपानी र पुनहिल घुम्न आउने पर्यटकको बसाई लम्बाउने उद्देश्यले सहायक गन्तब्यको पहिचान र पूर्वाधार विस्तारको कामलाई निरन्तरता दिएका हो।
रुपैयाँ ६ लाख बजेटबाट पुनहिलदेखि लुङलुङ सिद्ध, लालीगुराँसपार्क हुँदै घोडेपानीको फलेघर जोड्ने ४ किलोमिटर साइकल मार्ग निर्माण भएको छ भने गाउँपालिकाको रु. १४ लाख बजेटबाट लालीगुराँस पार्क जोड्ने पदमार्ग, प्रवेशद्धार र सार्वजनिक शौचालय निर्माण भएको छ।
यसैगरी ४ लाख बजेटबाट देउराली डाँडामा ४० मिटर ढुङ्गा बिछ्याएर पदमार्ग बनाइएको छ। रु. ३ लाख बजेटबाट तल्लो घोडेपानीमा बसपार्क निर्माण भएको छ । समुदायको अगुवाईमा यसैबर्ष घोडेपानी हुँदै कास्कीको उल्लेरी सडक सञ्जालमा जोडिएको थियो।
गण्डकी प्रदेश सरकारले बिनियोजन गरेको रु. ५ लाख बजेटबाट घोडेपानीदेखि घान्द्रुक जाने पदमार्ग निर्माण योजना पनि सम्पन्न भएको छ। घोडेपानीदेखि ४५ मिनेट उकालोमा पदयात्रा गरेपछि पुगिने पुनहिलबाट गुर्जा, पुथा, मानापाथी, निलगिरि, अन्नपूर्ण र माछापुच्छ्रे हिमशृङखलाको दृष्य अवलोकन गर्न सकिन्छ ।
घोडेपानी–पुनहिल विश्वप्रसिद्ध अन्नपूर्ण चक्रीय पदमार्गको प्रमुख पर्यटकीय गन्तब्य हो ।
प्रकाशित मिति: सोमबार, असार २९, २०८३ ०८:०१
