काठमाडौं महानगरपालिका वडा नंबर २२ का वडा अध्यक्ष चीनिकाजी महर्जन आत्मविश्वासी अनि आत्मनिर्णयका प्रखरधनी लोकप्रिय तथा जनप्रिय वडा अध्यक्ष हुन्। जसको सोचमा केवल विकास र जनसेवा मात्र रहेको छ। स्पष्टवक्ता, बौद्धिक व्यक्तित्व, युवा नेता जसले विकास निर्माणका प्रशस्त काम गरिसकेका छन्। समाज परिवर्तनका संवाहक ऊर्जनशील वडा अध्यक्ष चिनीकाजी महर्जनसंग नामी साप्ताहिकका लागि लिएको अन्तरवार्ताको सारसंक्षेप:–
निर्वाचित भएको साढे चार वर्षभन्दा बढी समय बितिसकेको छ, योजना अनुसार के कति कामहरु भएका छन् ?
निर्वाचित हुनुअघि घोषणा पत्रमा जुन किसिमको प्रतिबद्धताहरु भएका थिए, त्यही प्रतिबद्धता अनुसार नै कामहरु पूरा भएका छन्। कस्तो अवस्थामा निर्वाचित भएका थियौं भने स्थानिय निकायमा १५ वर्षभन्दा बढी जनप्रतिनिधि विहिन भइसकेको अवस्था थियो। कर्मचारीबाट अर्जेन्ट काम बाहेक अरु विकास निर्माणका कामहरु भएको थिएन। त्यस्तो अवस्थामा निर्वाचित भएर आउँदा १५ वर्ष अघिदेखिको काम र विकास निर्माणका कामहरु प्रसस्त थिए। तरपनि, हामीले जनताको माग, इच्छा र चाहना अनुसार सबै कामहरु सम्पन्न गरेका छौं। प्रतिबद्धता अनुसार विकास निर्माणका कामहरु पनि भएका छन्। अहिलेको संविधानले हामीलाई धेरै अधिकार दिएको छ। जस्तै शिक्षा, स्वास्थ्य, कृषि लगायतका क्षेत्रमा हामीले उल्लेख्य विकास गर्ने मौका पाएका छौं। काम गर्दै जादा धेरै कुराहरु पनि सिक्दै गएको अवस्था छ। हाम्रो वडामा यो पार्टी त्यो पार्टी भन्ने छैन, वडामा एक अर्कालाई साथ र सहयोग गर्ने भावना छ। यद्यपि यो भन्दा अगाडिको र्निाचनमा म वडा सदस्य भएर काम पनि गरिसकेको छु। त्यसकारण पनि काम गर्न सजिलो भएको छ।
पहिले र अहिलेको अवस्थामा काम गर्न कत्तिको सहज छ ?
पहिले र अहिलेको अवस्थामा धेरै परिवर्तन भइसकेको छ। बजेटको आकारमा पनि परिवर्तन भइसकेको छ। म आफू कस्तो खालको मान्छे हो भने जनताको सेवा गर्न पाउँदा आफूलाई निकै गौरवान्दित महशुस गर्छु। यहाँका स्थानिय जनतालाई कसरी सर्व सुलभ रुपमा सेवा सुविधा दिन सकिन्छ त्यसको बारेमा अध्ययन गर्छु र सोही अनुरुप काम गर्छु। पहिला पनि म सामाजिक सेवा गर्दै हिडेको र स्थानिय तहमा वडा सदस्यको रुपमा काम गरिसकेको कारण मलाई प्रत्येक सर्वसाधारणको समस्याको बारेमा अवगत छु। काम गर्न सजिलो पनि छ। स्थानिय सर्व साधारणको साथ र सहयोगले पनि अगाडि बढ्न सजिलो भएको छ।
महिलाको लागि कस्तो खालको तालिमहरुको व्यवस्था गर्नु भएको छ ?
जनसंख्याको हिसाबले हेर्ने हो भने आधा भन्दा बढी जनसंख्या महिलाले ओगटेको छ। तर पनि सामाजिक, राजनितिक रुपमा उहाँहरुको समर्थन र सम्मान भइरहेको अवस्था छैन। हुन त राज्य व्यवस्थामा पोलिसि मेकरहरु पनि पुरुष नै भएको कारण पनि यस्तो हुन सक्छ। थोरै बजेटमा घरेलु शिपहरुसंग सम्बन्धित कुराहरु झोल साबुन बनाउने, अचार बनाउने, मिठाई बनाउने, डल बनाउने, सिलाई बुनाई, कटाई, बेकरी, पार्लर लगायतका तालिमहरुको व्यवस्था गरिएको छ। तर महिला सशक्तिकरणमा जुन खालको नीतिगत रुपमा सैद्धान्तिक रुपमा प्रशिक्षित गर्ने कुरामा चाँहि माथिबाट नै मार्गदर्शन नमिलेको कारण यस्तो भएको हो। महिलाहरुलाई चाँहि अचार बनाउने, केक बनाउने जस्ता घरेलु काम मै अल्झिनु परेको अवस्था छ।
काठमाडौं महानगरपालिका-२२ मा खानेपानी तथा ढल व्यवस्थापन विकास कार्यमा के कस्तो प्रगती भइरहेको छ ?
वास्तवमा भन्नुपर्दा नेपालको राजधानी काठमाडौं महानगरपालिको वडा नम्बर २२ नेपालकै पहिलो अर्गनाइजेशन शुरु भएको प्रशस्त सेवा सुविधा भएको वडा हो। वि.सं. १९९० सालको भूकम्पपछि यो शहरलाई पश्चिमा शैलीमा विकसित गरिएको छ। दमकल गुडाउन मिल्ने सडक, मान्छेहरु हिड्ने छुट्टै सडक, गाडीहरु गुड्ने छुट्टै सडकको विकास गरिएको छ। न्यूरोडदेखि जुद्धशालिक, पाको, इन्द्रचोक, धर्मपथ, खिचापोखरी यि ठाउँहरु भनेको नेपालमा सबैभन्दा पहिला व्यवस्थित ढंगले विकसित भएको ठाउँ हो। वि.सं.१९९३ सालमा निर्माण भएको पूर्वाधारहरु अहिले जिर्ण बनेको अवस्था छ। ढल व्यवस्थापन, खानेपानी, शहरी पूर्वाधारहरु अहिले जिर्ण भइसकेको छ। त्यो संगै खानेपानीको पनि समस्या छ। यि सबै व्यवस्थित तरिकाले निर्माण कार्य भएको छ।
पर्यटनको दृष्टिकोणले पनि निकै महत्वपूर्ण छ के भन्नुहुन्छ ?
नेपालको राजधानी काठमाडौं शहर नै एक पर्यटकिय शहर हो। २ हजार वर्ष पूरानो वस्ती हो यो। तेबहालमा संकटा मन्दिर जुन १३ सय वर्ष पूरानो मन्दिर, महाँकाल, धर्मचक्र महाविहार जस्ता विभिन्न पर्यटकिय स्थलहरु छन्। त्यो भन्दा पनि यो शहर बढी व्यापारिक केन्द्र विन्दु भएको शहर हो। सबैभन्दा बढी मोबाइल पसल भएको शहर, सबैभन्दा बढी धातु विक्रि हुने ठाउँ सुनचाँदी, हिरा, तयारी पोशाक विक्रि हुने शहर, ३ सयभन्दा बढी सहकारी भएको वडा, क वर्गको २१ वटा बैंकहरुको शाखा कार्यालय, ५० भन्दा बढी विकास बैक, फाइनान्स र १० हजारभन्दा बढी व्यापारिक केन्द्र भएको वडा हो। यो पर्यटकिय दृष्टिले महत्व त हो नै र आर्थिक केन्द्र विन्दु पनि हो।
