टेकेन्द्र बोहरा । बझाङका जिल्लाका ग्रामिण भेगमा सडकहरुमा चल्ने साना सवारी साधनहरुले मनोमानी रुपमा भाडा असुल्ने गरेका छन्।
जिल्लाको तलकोट गाउँपालिका, मष्टा गाउँपालिका, छबिसपाथिभेरा गाँउपालिका, खप्तडछान्ना गाँउपालिका, केदास्युँ गाँउपालिका, दुर्गाथली गाँउपालकिा, र सुर्मा गाँउपालिका लगाएका शाखा सडकहरुमा मनोमानी रुपमा भाडा असुल्ने गरेका छन्।
जिल्ला प्रशासन कार्यालय बझाङले जिल्लाभित्र चल्ने साना सवारीसाधन (जिप) को भाडादर पक्की सडकमा प्रति कि.मि ७ रुपैयाँ र कच्ची सडकमा प्रति कि.मि. १२ रुपैयाँ कायम गरेको थियो।
जिल्ला प्रशासन कार्यालयले भाडादर कायम गरेको भएतापनि साना सवारीसाधनहरुले मनोमानी रुपमा भाडा असुल्ने गरेको तलकोट गाँउपालिका स्थानिय विर्ख बहादुर सिहले बताए।
सिंहले भने, जिल्ला प्रशासन कार्यालयले कायम गरेको दररेट एउटा तर जिव ब्यवसायीहरुले लिने दर अर्कै छ यसकारण स्थानियहरु भाडादरको चर्को मारमा पर्ने गरेका छन्।
त्यस्तैगरी अर्का स्थानिय हरी कुवरका अनुसार सदरमुकाम चैनपुरको जिप पार्कवाट तलकोटको खौला वजारसम्म जम्मा २५ किलोमिटरको ३ सय रुपैयाँ हुन आउछ तर जिव ब्यावसायीहरुले ५ सय लिने गरेको बताए।
सदरमुकाम चैनपुरबाट तमैलसम्म ११ किलोमिटरको दुरीमा रहेको तमैल बजारसम्म १ सय ५० रुपैयाँ भाडा लिने गरेका छन्। जबकि प्रशासनले चैनपुरदेखि तमैलको भाडा ६८ रुपैयाँ ७५ पैसा तोकेको छ।
त्यस्तै सदरमुकाम चैनपुरवाट कैलाससम्म ९ किलोमिटर कच्चि सडक भएपनि प्रतिब्यक्ति ४ सय रुपैयाँ लिने गरेका छन्। पक्की कच्ची सडकहरुका ठाँउठाँउमा अस्थाई प्रहरी चौकी ट्राफिक प्रहरी चौकी भएतापनि खुलेयाम रुपमा भाडा दर असुल्ने गरेका छन्।
यस बिषयमा जिल्ला प्रसासन कार्यालय र सरोकारवाला निकायहरुको खासै रूपमा सक्रियता कम देखिएको स्थानियहरुले बताएका छन्।
प्रकाशित मिति: बुधबार, माघ १९, २०७८ १५:१२
