महिला घर भित्र बस्ने मात्र होइन। सशक्त रुपमा आवाज बुलन्द गरी अगाडि आउनु पर्छ भन्ने मान्यता राख्ने निडर स्वभावकी रुपन्देहीको सियारी गाउँपालिको उपाध्यक्ष अमृता गुरुङको फराकिलो सोच छ ।
महिलाभएकै कारण महिला पछाडि परेको होइन । महिला आफ्नै संकिर्ण सोचले गर्दा पछाडि परेको बताउँछिन्। म गर्छु, म सक्छु भन्ने भावना जबसम्म विकास हुँदैन। तबसम्म महिला अघि बढ्न सक्दैनन् । महिलाबाट नै महिला हिंसामा परेको भन्छिन् उनी।
महिलाहरु अगाडि बढ्न नसक्नुको कारण भनेको आर्थिक कारण नै प्रमुख हो। महिलाहरुलाई कसरी अगाडि बढाउन सकिन्छ भन्ने कुराको अध्ययन गर्दा आयआर्जनको कुरा मुख्य मान्न सकिन्छ। जबसम्म महिलाहरु आर्थिक, सामाजिक रुपमा सशक्तहुन सक्दैनन्, तबसम्म सधै हिंसामा पर्छन्।
बेकरी तालिम, डल बनाउने, ब्यूटी पार्लर, सिलाई, कटाई, बुनाई जस्ता तालिमहरुमा मात्र महिलालाई अल्झाउनु हुँदैन। महिलाहरुको क्षमताअनुसार तालिम दिन सक्यो भने मात्र समग्र महिलाहरुको विकास हुने कुरामा जोड दिन्छिन्।
स्थानिय जनप्रतिनिधि नहुँदा कर्मचारी मार्फत निकै वर्ष कामहरु संचालन भए, जब स्थानिय निर्वाचन भयो, जनप्रतिनिधि निर्वाचित भए, तव कामहरु सुचारु रुपमा सञ्चालन भए । अनेकौं समस्याहरु थिए, कामगर्दा चुनौतीहरु पनि नआएका होइनन्। ती चुनौतीहरु जसलाई अवसरको रुपमा लिन सकियो भने काम गर्दा अझ जोश जाँगर आउने बताउँछिन् उनी।
आफू बिद्यार्थी हुँदादेखि नै राजनीतिमा सक्रिय सहभागिता रहेको र अहिलेसम्म गरेको गाउँपालिकाको काममा आफू सन्तुष्ट भएको कुरा उनी बताउँछिन्। हुन् त आफ्नो काममा सन्तुष्ट भइयो भने प्रगति हुँदैन भन्छन्, तर जब आफ्नो काममा नै सन्तुष्ट हुन सकेनौं भने अरु काम गर्न सकिदैन ।
लगभग ५ वर्षको अवधिमा विकास निर्माणका प्रसस्त कामहरु भएको छ। बाटो घाटोदेखि खानेपानीमा सुधार आएको छ। शिक्षामा पनि प्रगति नै भएको छ। प्राविधिक बिद्यालय संचालन भएका छन्। कृषि पनि राम्रो विकास भएको छ । दुग्धव्यवसायले तिब्रता पाएको छ। त्यसो त सियारी गाउँपालिका माछाको व्यवसाय लागि प्रमुख मानिन्छ भने केरा खेतीको लागि पनि केन्द्र नै मानिन्छ।
राजनीति पेशा होइन सेवा हो । यस क्षेत्रमा आबद्ध भएपछि गुमाएको छैन, राष्ट्रिय तथा अन्तर्राष्ट्रिय महिलाहरुसँग सहकार्य र समन्वय गर्न पाएको र उनीहरुको हरेक समस्याहरुसंग आफूले भिजेर समाधान गर्ने, कसरी आयआर्जनमा अघि बढाउने भन्ने कुराको अध्ययन र अनुसन्धान गर्न पाएको बताउँछिन्। प्रगतिशिल गीतहरु सुन्न मन पराउने गुरुङ हरेक नागरिकले राजनीति बुझ्नु पर्ने भन्छिन्।
