दलिय राजनीति गर्ने नेताहरुको क्रियाकलापवाट नेपाली जनता साँच्चै वाक तथा दिक्क नै भैसकेको प्रमाण विना दलका स्वतन्त्र उम्मेदवारहरुको एक पछि अर्को स्थानवाट स्थानीय निर्वाचनमा निर्वाचित भएवाट प्रमाणित भएको छ।
देश तथा जनताको लागि लडेका भनेका राजनीतिक पार्टीहरु नै सत्ताको लागि लुछाचुडी गरिरहेको अनि आफ्नाका लागि पृष्ठपोषण मात्र गरिरहेको देख्दा नेपाली जनता वाक्क दिक्क हुनुपनि स्वभाविक हो।
यो स्वभाविकतामा त्यसको विरोध स्वरुप राजधानी काठमाडौंको मेयरमा लौरो चिन्ह लिएर स्वतन्त्र उम्मेदवारी दिएका बालेन (बालेन्द्र) साहलाई शानदार मत दिएर काठमाडौं महानगरवासीले जिताएका छन् । बालेन साहको जित भनेकै काठमाडौंं महानगर आफ्नै बाउको बिर्ता हो भन्ने नेपाली कांगे्रस तथा नेकपा एमालेका लागि ठूलो झाप्पड नै हो।
जनताले चाहेमा पार्टीका नेतालाई पाखा लगाइदिन बेर मान्दैन भन्ने तथ्य बालेन साहको भारी मतले भएको जितले ठूलो उदाहरण दिएको छ। काठमाडौंमा जस्तै पूर्वी नेपालको धरान उपमहानगर पालिकामा पनि लौरो चिन्ह नै बोकेर एक्लै चुनावी मैदानमा उत्रेका स्वतन्त्र उम्मेदवार हर्कराज साम्पाङ राईको जितले त अझ सत्यवादीहरुको पछाडि कुनै भीड हुदैन।
केवल सत्य–यथार्थ हुन्छ भन्ने नै प्रमाण देखाइदिए । जनताको मनमा बसेपछि जुनसुकै ठूला पार्टीका उम्मेदवारलाई पनि माटो खुवाउन स्वतन्त्रवाटै उठ्ने उम्मेदवारवाट गराउने पनि उनै नेपाली जनता नै हुन्। जनताभन्दा माथि नेता तथा राजनीतिक पार्टी छँदै छैन भन्दा पनि हुन्छ ।
सत्यका न्यायिक अड्डा भनेकै जनताको भोट भन्ने कुरा स्थानीय निर्वाचनको परिणाममा काठमाडौंमा बालेन साह, धरानमा हर्कराज साङपाङ राई जस्तै जनकपुर उपमहानगरमा पनि स्वतन्त्र मनोज कुमार साहले जितवाट पनि पुष्ट्याई दिइसकेको छ।
त्यस्तै सुदुर पश्चिमको धनगढी उपमहानगरमा स्वतन्त्र उम्मेदवार गोपाल हमाल विजयी बनेका छन् । बालेन, हर्क, मनोज र गोपाल वास्तवमै दलिय राजनीतिभन्दा माथि उठेर नेपाली जनताले चुनेर नेपाली जनताको पक्षमा कार्य गर्न र गराउन पाँच बर्षका लागि अख्तियार प्राप्त मेयरहरु हुन् । यी स्वतन्त्र मेयरहरुलाई महानगर, उपमहानगर र नगरमा पार्टीका वडा अध्यक्ष तथा सदस्यमा जितेकाहरुले सहज ढंगवाट काम गर्न दिने हुने हो या अवरोध मात्रै खडा गर्ने हो ? त्यो पनि हेर्न वाँकी छ।
काम गर्दैजांदा सहजताको नाममा कुनै पार्टीमा विचलित बनेर समाहित बन्न पुग्यो भने, निश्चित रुपमा उनीहरुले जनमतको कदर नगरेको ठहर हुन्छ । यसतर्फ, स्वतन्त्रवाट जितेका चार मेयरहरुले समयमा नै ध्यान दिनु आवश्यक छ।
-नामी साप्ताहिकबाट
प्रकाशित मिति: शनिबार, जेठ १४, २०७९ १३:२७
