राजनीति आफैमा फोहर भैरहेको वर्तमान अवस्थामा फोहरमा नै राजनीति हुने गरेको छ। जसको कारण फोहर व्यवस्थापन सधै टाउको दुख्ने विषय बन्दै आएको हो ।
स्थानीय सरकारमा निर्वाचित भएर आउने गाउँपालिका, नगरपालिका देखि महानगरपालिकासम्मका मेयरहरुको मुख्य टाउको खाने विषय नै फोहर व्यवस्थापन हुने गरेको छ।
३० बैशाख, २०७९ को स्थानीय सरकारको निर्वाचन अघि र पछि पनि यो फोहर व्यवस्थापनको राजनीतिले चर्को टाउको दुखाइको विषय बन्दै आएको छ । जसको चर्को मार देशकै जेठो महानगरपालिका काठमाडौं महानगरपालिकाका नवनिर्वाचित स्वतन्त्र मेयर बालेन्द्र साहलाई भएको छ ।
स्वतन्त्र उम्मेदवारको रुपमा दलिय राजनीतिलाई चुनौतिका रुपमा काठमाडौं महानगरका जनताको भारी मतवाट मेयरमा विजयी मेयर साह फोहरको उचित व्यवस्थापन नगरिकन विजयी जुलुस तथा विजयीको माला समेत नलाउने कसमका साथ कार्य गर्नमा तल्लिन भएको खवर सार्वजनिक भएकै हो।
चुनाव जितेकै दिन पदवहाली नगरिकनै सवैभन्दा पहिला काठमाडौको फोहर विसर्जन गर्ने स्थान नुवाकोटको सिसडोल र बञ्चरे डाँडाको अवस्थाको अवलोकन भ्रमण गरेर एक्सनमा गएका थिए।
सिसडोल ओखरपौवा वासीको समस्या र त्यहाँको पीडालाई आत्मसात गरेर उनीहरुको माग संवोधन नगरिकन त्यहाँ फोहर विसर्जन नगर्ने कसमकासाथ क्रियाशील मेयर साहको लागि यो फोहर राजनीतिको गलाको पासो जस्तो नै बनेको छ।
यद्यपि, यसको दीर्घकालिन समस्याको समाधानका लागि पूर्वप्रधानमन्त्री तथा नेकपा एमालेका अध्यक्ष केपी शर्मा ओलीदेखि बहालवाला प्रधानमन्त्री तथा नेपाली कांग्रेसका सभापति शेरवहादुर देउवासम्ममा पुगेर भेटघाट गरेर उचित निकासका लागि छलफल समेत गरेका छन्।
फोहरलाई मोहर मात्र होइन, डलर वनाउने योजना ल्याउनै नसकेका ओलीदेखि देउवासम्मको फोहर राजनीतिमा समाधानी खोज्नु कठिन कार्य हो।
फोहरमा डलर देख्ने मध्यपुर थिमि नगरपालिकाका पूर्वमेयर मदनसुन्दर श्रेष्ठ वाहेक वितेको पाँच बर्षमा कुनैपनि मेयरले फोहर व्यवस्थापनमा उचित समाधान निकाल्न नै सकेको देखिएन। बालेन्द्र साहले पनि फोहरलाई केवल विसर्जनको उचित गन्तव्य मात्र खोजेर समाधान गर्न नसकेमा उही फोहरको राजनीति मात्र हुने निश्चित छ।
यदि, फोहरको राजनीतिवाट दीर्घकालिन समाधान खोज्ने हो भने, फोहरमा विसर्जन खोज्ने होइन, फोहरलाई अर्गानिक मल लगायतका सामाग्री उत्पादन गरेर मोहर मात्र होइन, डलर कमाउने योजना ल्याइनु पर्दछ।
फोहरवाट मध्यपुर थिमि नगरपालिकामा जस्तो अर्गानिक मल वनाउने फ्याक्ट्री नै खोल्न सकेमा सिसडोल तथा बञ्चरे डाँडा पुगिरहनु पर्दैन।
घर–आँगनको फोहर घर–आँगनमा नै विसर्जन गरेर त्यसलाई डलर बनाउने कार्यमा लगाएमा दशकौदेखि टाउको दुखाइको विषय बन्दैआएको फोहर राजनीतिको अन्त्य हुने थियो ।
यसमा मेयर साह लगायतका सवै स्थानीय सरकारका मेयरहरुको ध्यान जानु जरुरी छ।
