लामो समय उही पुरानै नेताहरुको वाक्कै लाग्ने अनुहार हेर्दैआएको धेरै समय वितिसकेको छ । नेपाली जनताको नाममा राजनीति गर्ने ती पुराना अनुहारले केवल आश्वासन मात्र बाँड्ने तर, खासै काम भने गरेको पाइएन ।
उही थोत्रा र फुस्रा आश्वासन बाँड्न बाहेक केही नगरेको सवैले देखेकै हो। अनि भोगेकै हो। जसको कारण जागरुक बनिसकेको नेपाली जनतालो परिवर्तन खोजेका छन् ।
नयाँ पुस्तालाई एक पछि अर्को गरेर अघिल्लो स्थानीय निर्वाचन तथा मंसीर ४ गते हालै संपन्न भएको प्रतिनिधिसभा तथा प्रदेशसभा निर्वाचनवाट नेपाली राजनीतिमा आगमन गराएको छ । पुराना पुस्तालाई विस्तारै विदा दिने कार्य भएको छ। मंसिर ४ मा सम्पन्न प्रतिनिधिसभा र प्रदेशसभा सदस्यको निर्वाचनमा धेरै नयाँ र युवा अनुहारहरू निर्वाचित हुनु सकारात्मक पक्ष हो ।
निर्वाचन ऐनमा प्रतिनिधिसभा र प्रदेशसभाको उम्मेदवार बन्न कम्तीमा २५ वर्ष पुगेको हुनुपर्ने प्रावधान राखिएको छ । हाल निर्वाचित धेरै युवा जनप्रतिनिधिहरू ३० र ३० भन्दा कम उमेर समूहका छन् ।
नयाँ र स्वतन्त्रबाट निर्वाचित केही जनप्रतिनिधिहरू पनि ३० वर्षे उमेर समूह वरिपरिका छन् । यसरी निर्वाचित केही युवाले त आफूहरूको विजयसँगै देशको राजनीतिमा ‘युवा युग’ आरम्भ भएको दावी पनि गरिरहेका छन् । वास्तवमा नेपालको पछिल्लो राजनीतिमा ‘युवा युग’ को आरम्भ भएको वर्तमान अवस्थाको यथार्थ हो ।
युवा वर्गको यो उत्साह चुलिएको छ। नेपाली राजनीतिमा अव नयाँ मात्रै आउनुपर्छ र पुराना नेताहरूलाई हराउनै पर्छ भन्ने धारणा आएको छ । जसमा ‘नो नट अगेन’ नामक विवादास्पद अभियानले समेत यसलाई पुट गरेको छ । जसको फाइदा भने नयाँ आएका पार्टीले लिए र अधिकांश युवा उम्मेदवारहरू विजयी पनि भए । युवा विजयी हुनु सकारात्मक कुरा हो । विश्वको इतिहासमा युवाहरुले मुलुकै नेतृत्व गरेको इतिहास विश्व सामू छ ।
त्यसका लागि अहिले नयाँ आएको पार्टी तथा स्वतन्त्रबाट विजयी भएका युवा उम्मेदवारहरूसँग उर्जाशील उमेर भएतापनि स्पष्ट विचार छैन । नेतृत्वका लागि उर्जाशील उमेर मात्र नभइकन स्पष्ट विचार पनि आवश्यक छ । स्पष्ट विचारले नै नेतृत्व प्रदान गर्ने गर्दछ । स्पष्ट विचार तथा ऊर्जनशील उमेरको परिपक्वतासंगै नेपाली राजनीतिलाई हाँक्न सकेमा विकास–निर्माणले सही मार्ग लिने निश्चित छ ।
स्वतन्त्रवाट मात्र नभइकन विभिन्न पार्टी विशेषवाट पनि युवाहरु निर्वाचित भएको कारण युवाहरुले नै नेतृत्व लिनुपर्ने सवाल पनि उठिरहेको छ । नेपाली काँग्रेसका झापावाट निर्वाचित युवा प्रतिनिधिसभा सदस्य विश्वप्रकाश शर्मा अर्का युवा काठमाडौं क्षेत्र नंबर ४ वाट निर्वाचित प्रतिनिधिसभा सदस्य गगन थापालाई प्रधानमन्त्री बनाउने कसरतमा छन् ।
युवाले युवालाई साथ तथा सहयोग गरेर प्रधानमन्त्री बनाउने होड सकारात्मक पक्ष हो । यस्तै कसरत अन्य पार्टीका युवा नेताहरुले पनि गर्न र गराउन आवश्यक छ ।
प्रकाशित मिति: आइतबार, मंसिर १८, २०७९ १३:३४
