आम नेपालीहरुको जीवनशैली पहिलाको जस्तो छैन् । दिनप्रतिदिन जटिलतामा पर्दैगएको छ । पहिला जस्तो सक्रिय जीवन शैलीवाट आम नेपालीको जीवन शैली निस्क्रिय हुन थालेको छ । न्यूनतम आधारभूत व्यायाम तथा हिंडडुलका कार्य पनि गर्न अल्छी मान्न थालेको वर्तमान अवस्थावाट जीवनशैली अस्थिर बन्न थालेको छ ।
दौडधुप तथा भागदौडको जीवनशैली वोक्न थालेको आम नेपालीको जीवन शैलीले आफ्नो जीवनको लागि खासै सोच्न छाडेको पाइदैन । जसको कारण कुसमयमा नै विभिन्न रोगको शिकार वन्न थालेको पाइन्छ । बाउबाजेले नभोगेको अनेक घातक रोगका शिकार तन्नेरी अवस्थामा नै बन्ने गरेको यो जटिल अवस्थाले उनीहरुलाई अनाहक समस्यामा पार्न थालेको छ। यसलेगर्दा धनजनको धेरै क्षति भैरहेको छ । जुन दुःखद परिस्थिति हो ।
यो हुनुमा फेसन अनि देखासिकी तथा अमलको रुपमा धूमपान, मद्यपान गर्नु तथा नियमित व्यायाम नगर्नु, अस्वस्थ खानेकुराको सेवन गर्नु हो । जसवाट घातक मुटुरोग जस्ता रोगहरुले अड्डा जमाउने गर्दछ । पछिल्लो समय हामी नेपालीहरुको खानपान र जीवनशैली पश्चिमा संस्कृतिबाट प्रभावित भएको छ । हामी व्यायाममा पनि अल्छी भएका छौँ ।
प्याक गरेको खानेकुरा, ड्राइफुड र जंकफुड खानपिनमा बढी प्रयोग गर्न थालेका छौ । यस्ता खानेकुरामा खानका लागि सजिलो भए पनि त्यसमा चिल्लो र नुनको मात्रा बढी हुने भएकाले हाम्रो स्वास्थ्यमा व्यापक असर पर्ने गर्दछ । अनि हाम्रो शरीरलाई रोगको घर बनाउने यो पनि प्रमुख कारण हो । यसतर्फ हामी सचेत हुनु आवश्यक छ ।
अर्कोतर्फ, हामीले घरमा बनाउने सामान्य खानेकुरा, सागसब्जी, फलफूलमा पनि ध्यान दिनुपर्छ। विषादी प्रयोग भएका खानेकुराले हामीलाई असर गरिरहेको हुन्छ । विषादीका कारण क्यान्सर जस्ता घातक रोग लाग्ने संभावना भएको कारण यसतर्फ पनि सवै सचेत हुनु पर्छ ।
भान्सादेखि शौचालयसम्म हामीले ध्यान दिन सकेमा हाम्रो स्वास्थ्यमा कुनै गडबढी नहुने स्वास्थ्यविज्ञहरुको राय भएको कारण सचेत बनौं। अस्थिर जीवनशैलीलाई स्थिर बनाउने कोशिश गरौं । स्वस्थ र निरोगी बनौं।
प्रकाशित मिति: आइतबार, चैत १२, २०७९ ०७:३८
