मेलबर्न अष्ट्रेलिया । भिक्टोरियन बहुसांस्कृतिक आयोगका लागि बारवन साउथ वेष्ट रिजनको प्रतिनिधित्व हुने गरी २०१९–२१ का लागि सल्लाहकारका रुपमा कार्यरत एवम् ग्रेटर जिलोङ नेप्लिज कम्युनिटीका सक्रिय सदस्य नेपाली मूलका ज्ञानेन्द्र उप्रेतीको पहलमा समुदायका सदस्यहरुले सामना गर्न परेका बिभेदकारी सामाजिक, आर्थिक र राजनीतिक हैरानीहरुलाई न्यूनिकरण गर्ने उद्धेश्यकासाथ अस्ट्रेलियाको भिक्टोरियामा नयाँँ परियोजनाको पाइलट प्रोजेक्ट “Community Led initiative” सूत्रपात भएको छ ।
कोभिड्–१९ का कारण मेलबर्नमा गरिएको जुम मिटिङ सकिएलगत्तै यस परियोजनाले औपचारिकता प्राप्त गरेको हो । यसै परियोजना अन्तर्गत सम्बन्धित बिभिन्न समुदायकाबीच जुलाई २३ मा जिलोङमा अरबी भाषामा, अगस्ट २० मा जिलोङमा डारी भाषामा, सेप्टेम्बर २४ मा जिलोङमा कारेन भाषामा, २२ अक्टोबरमा जिलोङमा अंग्रेजी भाषामा १९ नोभेम्बरमा तमिल भाषामा कोलाकमा अंग्रेजी भाषामा र २१ जनवरीमा वार्नाबुलमा अंग्रेजी भाषामा “Safety at work : know your rights and responsibilities”कार्यक्रमहरु सञ्चालन गरिने भएका छन् ।
भिक्टोरियन बहुसांस्कृतिक आयोगका कमिसनर, शरणार्थी सप्ताह २०२१ का दूत एवम् माइग्रान्ट वर्कर केन्द्रका सेफ्टी दूत शंकर काशिनाथनद्धारा सञ्चालित कार्यक्रममा स्थानिय सरकारका प्रतिनिधिका रुपमा सांसद क्रिश्टियन कौजिन्स र ग्रेटर जिलोङका काउन्सिलर जिम मासनले मन्तब्य राखेका थिए ।
आयोजित कार्यक्रमका प्रमुख वक्ताको रुपमा डाइभरसिटाटका तर्फबाट स्ट्राटेजिक इन्गेजमेण्ट को–अर्डिनेटर प्रेहासिनी जोसेफ, भिक्टोरियन बहुसांस्कृतिक आयोगका लागि बारवन साउथ वेष्ट रिजनको प्रतिनिधित्व हुने गरी २०१९–२१ का लागि सल्लाहकारका रुपमा कार्यरत एवम् ग्रेटर जिलोङ नेप्लिज कम्युनिटीका सक्रिय सदस्य ज्ञानेन्द्र उप्रेती, फोएनिक्स एजुकेशनल, मल्टिकल्चरल इन्टिग्रेशन, कन्सल्टिङ, कम्युनिटी सर्भिसेसका प्रमुख कार्यकारी अधिकृत डा. मार्टिन घायोर मिनाइए रहेका थिए।
कार्यक्रममा माइग्राण्ट वर्कर्स सेन्टरका तर्फबाट भिमा मुनियापाह, लुम्बिनी–कपिलवस्तु विश्वअभियानका तर्फबाट दिदीबहिनी समाज भिक्टोरियाका अध्यक्ष डा. जमुना पराजुली, ग्रेटर जिलोङ नेप्लिज कम्युनिटीका अध्यक्ष डा. सन्तोष पाण्डेको उपस्थिति रहेको थियो।
ब्यक्ति वा संस्थाद्धारा अन्य ब्यक्तिहरुमा विभिन्न नियत र स्वार्थका कारण सामाजिक, आर्थिक र राजनीतिक रुपमा गरिने भेदभाव र हैरानी जस्ता संबेदनशिल मानवीय समस्या न्यूनिकरणका लागि उप्रेतीले यो परियोजनाको अवधारणाको परिकल्पना गरेका हुन्।
विगतमा आफूले भोगेका समस्या र बिभिन्न व्यक्ति र संस्स्थामार्फत विभिन्न व्यक्तिले यस्ता किसिमका समस्याहरु भोगेको आफूले देखेकाले यसबाटै उप्रेतीलाई यो परियोजना बारे सोच्ने प्रेरणा मिलेको हो ।
परियोजना २०२२ फरवरीमा सकिने छ र यो समय अवधिमा भए गरिएका कामको मूल्याङ्कनका आधारमा यस परियोजनालाई परिमार्जनकासाथ थप प्रभावकारी बनाउने किसिमले अगाडि बढाइने छ ।
यो परियोजना माइग्राण्ट वर्कर्स सेन्टर, डाइभरसिटाट लगायत बिभिन्न संस्थाहरुको सहयोगमा सामुदायिक सदस्य एबं नेतृत्वदायी ब्यक्तिहरुको समूहद्धारा सञ्चालन गरिने गरी तयार पारिएको छ ।
यो ऐतिहासिक महत्वपूर्ण परियोजना शुरु गर्न पहल गरेर सफलता प्राप्त गरेकोमा लुम्बिनी–कपिलवस्तु विस्व–अभियानका विश्व संयोजक तथा अन्तर्रास्ट्रिय नेपाली कलाकार समाज ‘इनास’का विश्व सल्लाहकार रामकुमार श्रेष्ठले फेसबुक मार्फत ज्ञानेन्द्र उप्रेती लगायत सम्पूर्ण टिमलाई हार्दिक बधाई र पाइलट प्रोजेक्ट समयाबधिमा आगामी परियोजना प्रभावकारी ढङ्गले अगाडि बढाउन उल्लेखनीय प्रभावकारी उपलब्धिहरु हासिल होस् भन्दै हार्दिक शुभकामना ब्यक्त गरेका छन् ।
प्रकाशित मिति: बुधबार, असार १६, २०७८ ०७:२८
