सम्पादकीय
राजनीति गर्ने नेताहरुको सोच तथा खोज भन्ने कुरा नै आगामी निर्वाचन हुने गरेको छ। निर्वाचनमा आफू र आफ्नो पार्टीलाई साम, दाम सवै प्रयोग गरेर जसरी भएपनि जिताउने भिजन र मिसन नै हुने गरेको हो । यस भिजन तथा मिसनमा आगामी २०८४ सालको आम निर्वाचनलाई लक्षित गरेर नेपालका ठूला पार्टीहरुले मिसन २०८४ नै बनाउन थालेका छन्। उनीहरुको मिसन ०८४ भनेकै चुनाव जितेर सवैभन्दा ठूलो पार्टी बनाउने र सरकार हाँक्ने नै हो।
यसक्रममा सत्तारुढ नेपाली कांग्रेसले कुनै पार्टीसंग गठवन्धन नगरिकन बहुमत ल्याएर एकल सरकार वनाउने मिसन ल्याएको छ। यसलगतै अर्को सतारुढ नेकपा एमालेले आगामी चुनावपछि एकल बहुमतको सरकार बनाउने लक्ष्य सहितको मिसन ८४ लाई तिब्रता दिएको छ।
यसको लागि रोडम्याप नै तयार गरिसकेको छ। जसको लागि दुई चरणको अभियान सकाएर तेस्रो चरणको कार्यक्रममाथि छलफल तथा बहस पनि सम्पन्न गरिसकेको छ। पार्टी कार्यक्रमको उद्देश्य आगामी चुनाव ०८४ बाट एमालेलाई पहिलो र बलियो शक्ति बनाउनु रहेको छ ।
त्यस्तै, पार्टीगत रुपमा नेपालको तेश्रो शक्ति मानिएको नेपाल कम्युनिष्ट पार्टीका (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ र उनको पार्टी पनि मिसन ०८४ मा नै होम्मिएको छ। प्रचण्डले पार्टीमा सिस्टम बनाएर उत्तराधिकारी नेता बनाउने तयारी भएको बताउंदै आएका छन्। मिसन ०८४ मा देश दौडाहामा रहेका प्रचण्ड आफ्नो लागि अध्यक्षभन्दा प्रचण्ड भन्ने नै ठूलो छ भनेर गर्ब गर्न चुकेका छैनन्।
यसो भन्नु स्वभाविक पनि हो । प्रचण्डलाई माओवादी केन्द्रको पार्टी अध्यक्ष भन्दा प्रचण्ड भन्ने ब्राण्ड बनाउन जुन उनले संघर्ष र मेहनत गरे। त्यो ठूलो कुरा हो । त्यस्तै मेहनत र परिश्रम देश विकास गर्न र गराउन सवै नेताहरु सवैले गरेको खण्डमा सवै नेपाली सुखी र समृद्ध हुने निश्चित थियो। तर, सवै पार्टी तथा नेताहरु आफ्नै र पार्टीको स्वार्थमा लागेर नेपाल र नेपालीको लागि खासै केही नयाँ कार्य गर्न र गराउन सकेको छैन्। जसको कारण नेपाली जनता नेता तथा पार्टीवाट वाक्क दिक्क नै भैसकेका छन्।
मिसन ०८४ मा सवै पार्टी पहिलो हुने होडमा मात्र देखिएको छ। नेपाल र नेपालीको लागि विकास तथा समृद्धिको लागि केही सोच राखेको खुलासा भएकै देखिएन । सवैको पहिलो हुने होडले नेपाल र नेपालीलाई पछि पार्ने हो कि भन्ने सवै नेपाली जनताको पिरलो छ। यसतर्फ पनि सोचेर मिसन ०८४ बनाउन आवश्यक छ।
नामी साप्ताहिकवाट
प्रकाशित मिति: शनिबार, असोज ५, २०८१ ०९:१०
