हिमाली दाजु तराई झरे लिएर पिरती
पहाडी बाटो बलौटे माटो साथमा ओखती।
ताप्लेजुङबाट बोकेर छुर्पी लिन्बुनी दिदीले
रहर छर्छौ कमाई गर्छौ झापामा बिधीले ॥
ईलामे चिया नपारी छिया रमाई हिडौंला
धनुषाबाट बोकेर धान दोलखा कटौला ।
संखुवासभा रसीलो ज्यादै खोटाङ्गे साथले
पाँँचथर हेर्छ रमाईलो गर्छ धनकुटा मज्जाले ॥
सुन र सरी कोशी हो तरी पुगेछौं तेर्हथुम
भोज र पुर खुकुरी सुर वीरको मलम ।
सप्तरी सॅँगै छ महोत्तरी उस्तै त्यो सर्लाही
उदयपुर ओखलढुङ्गा हिमाल मिलाई ॥
सोलु र खुम्बु मिलेको हेरौं रौतहट रामेछाप
चितवनबाट मकवानपुर तिर लिएर तोरी आँप
कपिलबस्तु रूपन्देही गुल्मी र बाँकेमा
खप्तड सधैं सुझाव दिन्छ नभुल्नु च्याँखेमा ॥
सगरमाथा रमाई बोल्छ आऊनु है नाम्चेमा
काठमाडौं यता रमाऊने गर्छ भक्तको नाँचमा
काभ्रेको मीठो नुवाकोटे ठिटो सिन्धुको साथमा
गोसाईकुण्ड बुद्दीको झुण्ड नेपाली माथमा॥
गोरखाली बीर ऊचो छ शिर देश हो नेपाल
धादिङ हुँदै पाटन पुग्यौं बनायौं बिशाल ।
सुरक्षा गर्यौ डटेर लड्यौ सकेन बिदेशी
रसुवा पर्षा सिन्धुली पाल्पा पर्बत परासी ॥
कास्कीको आलु नाचेर घाटु मनाङ्गे दाजुले
मुस्ताङबाट निर्मसी बेच्थे स्याङ्जाली बाजेले ।
जुम्लाको धान बढेको सान रूकुम रोल्पामा
सिरहाबाट मोरङ्ग बारा बस्यौ नि नाकामा ॥
कैलाली जान्छु अछाम हेर्छु बैतडी त्यो दाग दैलेख अर्घा दार्चुला पुग्यौ यता छ लम्जुङ ।
कञ्चनपुर डोटीमा जान्छु बर्दीया रमाई
बाजुराबाट बझाङ हेर्छु पौरखको कमाई ॥
डडेलधुरा सुर्खेत मुगु पवित्र प्युठान
तनहुँ डोल्पा जाजरकोट रमेको सल्यान ।
काली है कोट मार्सीको बोट हुम्लामा खेलौला
बाग्लुङबाट म्याग्दीको बाटो पोखरा बसौंला ॥
पशु र पती सही छ मती सीताको देश हो
भृकुटी हास्छिन् दिलले भन्छिन् माईती मेरो यो
यही हो देश नेपाली भेष स्वर्गको अंश छ
अति नै राम्रो सभ्यता हाम्रो बुद्धको बंश हो ॥
याे पनि :
नामी साप्ताहिक
प्रकाशित मिति: शुक्रबार, साउन ९, २०८२ ०७:५४
