काठमाडौं । नेकपा एमालेलाई उत्तेजित नबनाउन अध्यक्ष केपी शर्मा ओलीले अनुराेध गरेका छन् । शनिबार काठमाडौंको भृकुटीमण्डपमा आयोजित भव्य जनसभालाई सम्बोधन गर्दै अध्यक्ष ओलीले वर्तमान सरकारले संविधानविपरीतका कदम चालेर देशलाई अस्थिरतातर्फ धकेलेको आरोप लगाउँदै यस्ताे अनुराेध गरेका हुन् ।
सरकारले अनधिकृत सिफारिस, राजनीतिक दबाब र राष्ट्रपति संस्थालाई दुरुपयोग गरेर बनाएको सरकार नै अहिलेको राजनीतिक संकटको मूल कारण भएको उनको दाबी गर्दै एमाले जनताकै पार्टी भएकाे ठाेकुवा गरेका छन् ।
अध्यक्ष ओलीले भने, “एमालेलाई उत्तेजित र नजिक्याउन खोजिएको छ । यस्ता गैर–संवैधानिक अभ्यास रोकिएनन् भने मुलुक थप संकटमा पर्छ । सरकार हटाइ प्रतिनिधिसभा पुनर्स्थापना गर्नु अहिलेको मुख्य राजनीतिक आवश्यकता हो ।” उनले सबै राजनीतिक दललाई संविधान र लोकतन्त्र जोगाउन एकजुट हुन आह्वान गरे ।
ओलीले हालै २३ गतेको घटनालाई योजनाबद्ध रूपमा म्यापिङ गरी, छानेर घर–घरमा आगजनी गर्ने काम भएको बताए । २४ गतेको आन्दोलनका कारण हिंसा भयो भन्ने सरकारी प्रचार गलत र भ्रामक भएको उनको भनाइ थियो ।
उनका अनुसार पर्खाल भत्काउने, फलाम काट्ने, सार्वजनिक सम्पत्ति जलाउनेजस्ता गतिविधि सिंगो योजनाअनुरूप भए, जसलाई सरकारले ‘जनआन्दोलन’को नाममा लुकाउन खोजेको छ । उनले अन्तरिम सरकारलाई नै भ्रष्टाचार र षड्यन्त्रको दोषी ठहर गर्दै, “सरकारले आफैं पत्र बनायो, आफैंले जेनजीलाई पढायो, अनि त्यसकै परिणामस्वरूप बारामा आक्रमण गरियो,” भनेर आरोप लगाए ।
ओलीले प्रहरी प्रमुखको सरुवा पनि सोही ‘डिजाइन’ अनुसार गरिएको दाबी गर्दै सरकारको मनसाय लोकतन्त्र कमजोर पार्ने रहेको उल्लेख गरे ।
अध्यक्ष ओलीले एमालेलाई उत्तेजित नबनाउन सरकारलाई चेतावनी दिदैँ भने, “एमाले आज पनि जनतामाझ सबैभन्दा लोकप्रिय शक्ति हो । त्यसैले अबिलम्ब प्रतिनिधिसभा पुनर्स्थापना गरिनुपर्छ । यही बाटो सही हो, यही बाटो संविधानअनुरूप हो ।”
उनले जेएनजी (जनताको नयाँ जनमत) ले उठाएका मागहरू समाधान गर्न पनि पुनर्स्थापित संसदमार्फत कानुनी बाटो खोज्न सकिने सुझाव दिए । सबै दललाई ‘सरकारको जन्ती नबन्न’ आग्रह गर्दै उनले भने, “पुनर्स्थापना नै एकमात्र विकल्प हो, सबै दल त्यसैमा केन्द्रित हुनुपर्छ ।”
हालै गठन भएको ‘युथ भोलिन्टियर फोर्स’ को भूमिका उल्लेख गर्दै अध्यक्ष ओलीले यसले समाजमा शान्ति–सुरक्षा सहयोग पुर्याउने बताउँदै, “जनताले डराउनुपर्दैन, यो बल जनताको सुरक्षाका लागि हो,” भनेर विश्वास दिलाए ।
सरकार विध्वंशको जगमा बनेको छ : महासचिव पोखरेल
सोही कार्यक्रममा नेकपा (एमाले)का महासचिव शंकर पोखरेलले वर्तमान सरकार ‘विध्वंशको जगमा’ बनेको आरोप लगाए । उनका अनुसार सरकार निर्वाचन गराउने भूमिकामा छैन, बरु देशलाई झन् अन्योलतर्फ धकेलिरहेकाे छ ।
पोखरेलले भने, “यो परिवर्तन जनताको परिवर्तन होइन । यदि जनताको परिवर्तन हुन्थ्यो भने जनताको सहभागिता रहन्थ्यो । यो त आन्दोलनबाट होइन, आतंक र हिंसाद्वारा गरिएको परिवर्तन हो ।”
कार्यक्रमका अन्य वक्ताहरूले पनि वर्तमान सरकार चुनाव गराउन असमर्थ रहेको जिकिर गर्दै शीघ्र स्थिरताका लागि राजनीतिक सहमति आवश्यक भएको उल्लेख गरे ।
