काठमाडौं । काठमाडौं महानगरपालिकाका मेयर तथा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) ले माघ ४ गते मेयर पदबाट राजीनामा दिने भएका छन् । राजीनामापछि उनी सक्रिय चुनावी राजनीतिमा होमिन लागेका हुन् । यस क्रममा माघ ४ देखि ६ गतेसम्मको उनको राजनीतिक कार्यक्रम तालिका सार्वजनिक गरिएको छ ।
तालिकाअनुसार माघ ४ गते आइतबार बालेन शाहले काठमाडौं महानगरपालिकाको मेयर पदबाट औपचारिक रूपमा राजीनामा दिनेछन् । त्यसपछि राष्ट्रिय स्वतन्त्र पार्टीको वरिष्ठ नेताको हैसियतमा पार्टी कार्यालय प्रवेश गर्ने कार्यक्रम रहेको छ ।
सोही दिन पार्टी सभापति रवि लामिछानेसँगै त्रिभुवन अन्तर्राष्ट्रिय विमानस्थलबाट जनकपुर प्रस्थान गर्नेछन् । जनकपुर पुगेर उनी सांस्कृतिक तथा राजनीतिक महत्वका विभिन्न कार्यक्रममा सहभागी हुने कार्यक्रम छ ।
माघ ५ गते जनकपुरमा शक्ति प्रदर्शन
माघ ५ गते जनकपुरमा राष्ट्रिय स्वतन्त्र पार्टीको ठूलो राजनीतिक सभा आयोजना गरिनेछ । सभामा पार्टी सभापति रवि लामिछाने, वरिष्ठ नेता तथा आगामी चुनावका लागि प्रस्तावित प्रधानमन्त्रीका उम्मेदवार बालेन्द्र शाह, स्वर्णिम वाग्ले, शोभिता गौतम, मनीष झा लगायतका नेताहरूले सम्बोधन गर्ने कार्यक्रम तय भएको छ ।
माघ ६ गते उम्मेदवारी दर्ता
माघ ६ गते उम्मेदवारी मनोनयन दर्ताको दिन परेकाले पार्टीका धेरै नेताहरू आ–आफ्ना निर्वाचन क्षेत्रमा व्यस्त हुनेछन् । त्यसैले जनकपुर कार्यक्रममा सबै नेताको उपस्थिति अपेक्षाकृत कम हुने बताइएको छ ।
स्रोतका अनुसार जनकपुरको कार्यक्रमपछि माघ ६ गते दिउँसो करिब २ः३० बजे रवि लामिछाने र बालेन शाह सडकमार्ग हुँदै लाहान प्रस्थान गर्नेछन् । लाहानमा करिब ४ः३० बजे शहीदको सालिकमा माल्यार्पणपछि उनीहरूको यात्रा फरक हुनेछ ।
बालेन शाह झापातर्फ लाग्नेछन् भने रवि लामिछाने चितवनतर्फ प्रस्थान गर्ने कार्यक्रम छ ।
बालेन शाह साँझ करिब ७ बजे इटहरी पुगेर कार्यकर्तासँग भेटघाट गर्नेछन् । त्यसपछि करिब ७ः३० बजे दमकतर्फ प्रस्थान गर्ने र सोही राति दमकमा रास्वपाका केही नेतासँग महत्वपूर्ण राजनीतिक भेटघाट गर्ने कार्यक्रम तय गरिएको छ ।
झापा–५ बाट उम्मेदवारी
माघ ६ गते बिहान ११ बजे बालेन शाहले झापा निर्वाचन क्षेत्र नं. ५ बाट संघीय संसद् सदस्यका लागि झाँकीसहित उम्मेदवारी मनोनयन दर्ता गर्नेछन् । त्यसपछि उनी पार्टी कार्यकर्तासँग छलफलमा व्यस्त रहनेछन् । उता पार्टी सभापति रवि लामिछाने भने चितवन–२ बाट उम्मेदवारी दर्ता गर्नेछन् ।
जनकपुर कार्यक्रमका क्रममा रवि लामिछाने र बालेन शाहसँगै रहने रास्वपाका प्रवक्ता मनीष झाले माघ ४ देखि ६ गतेसम्मको कार्यक्रम तालिकाको पुष्टि गरेका छन् ।
झापा–५ मा कडा प्रतिस्पर्धाको चर्चा
झापा–५ बाट आगामी फागुन २१ गते हुने प्रतिनिधिसभा निर्वाचनको मनोनयन मिति नजिकिँदै जाँदा सामाजिक सञ्जालमा बालेन शाह र एमाले अध्यक्ष केपी शर्मा ओलीबीच कडा प्रतिस्पर्धा हुने चर्चा चुलिएको छ । धेरैले चुनावी परिणाम थोरै मतान्तरले टुंगिने अनुमान गरिरहेका छन् ।
रास्वपा झापाका कार्यवाहक सभापति प्रकाश पाठकले बालेन शाह सहजै चुनाव जित्नेमा आफू विश्वस्त रहेको बताएका छन् । बालेन आफैं झापा–५ मा आएर नेतृत्व गर्ने भएपछि स्थानीय कार्यकर्तामा उत्साह थपिएको पाठकको भनाइ छ ।
प्रचार अभियानका क्रममा बालेन शाहले देशभरका १६५ वटै निर्वाचन क्षेत्र पुग्ने र पुराना नेताहरूका ‘राजनीतिक किल्ला’ भत्काउने रणनीतिका साथ मैदानमा उत्रने तयारी गरेका छन् ।
