झापा । स्थानीय स्काउट शिवसत्ताक्षी नगरपालिका झापाको आयोजनामा सूर्योदय स्काउट ट्रुपका स्काउट विद्यार्थीहरूको लागि उदघोषण कला सम्बन्धी दुई दिवसीय अभिमुखी कार्यक्रम २०८२ माघ ११ र १२ गते भएको कार्यक्रम सम्पन्न भएको छ।
स्थानीय स्काउट शिवसत्ताक्षी नगरपालिका नगरपरिषदबाट २०८२ /०८३ का लागि विनियोजित बजेटबाट स्काउट विद्यार्थीहरूलाई उदघोषण सम्बन्धी दुई दिवसीय अभिमुखीकरण कार्यक्रम संपन्न भएको हो ।
सूर्योदय आधारभूत विद्यालयमा गठित सूर्योदय स्काउट ट्रुपमा मिति २०८२ माघ ११ र १२ गते सूर्योदय स्काउट ट्रुपका संयोजक तथा विद्यालयका प्रधानाध्यापक जगतवीर लिम्बुको अध्यक्षता साथै विद्यालय व्यवस्थापन समितिका अध्यक्ष देवीकुमार प्रधानको प्रमुख आतिथ्यतामा कार्यक्रम संपन्न भएको थियो।
साथै स्काउट समिति, अभिभावक, सम्पूर्ण शिक्षक, स्काउट विद्यार्थीहरू, स्काउट मास्टर र विद्यालयका शिक्षकहरूको समन्वयात्मक सहभागितामा कार्यक्रम सम्पन्न भएको आयोजकले जनाएको छ।
उदघोषण कला बालबालिकाहरूका लागि एकदमै आवश्यक सीप रहेका कारण यसमा पनि स्काउट विद्यार्थीहरू समाजसेवी भावना लिएर तयार हौँ को सिद्धान्त बोकी मिठो वोली, वचन र व्यवहारलाई जीवन्तता दिने कार्य भएको छ।
त्यस्तै, सामाजिक भावनाका साथ अगाडि बढ्नुपर्ने हरेक कार्यक्रमहरूमा आफ्नो सक्रिय सहभागिता रहनुपर्ने भएकाले बालबालिकाहरूका लागि उदघोषण कला बौद्धिक सिप विकासका लागि अपरिहार्य देखिन्छ। मानिसका भावनाहरू मिठो बोलेर जित्न सकिन्छ। त्यसैले राम्रो उदघोषण कला अभिमुखीकरण तालिम सार्थक बनेको सवैको भनाइ रहेको छ।
विद्यार्थीहरूलाई उद्घोषण कलाको विकास गरी कार्यक्रम सञ्चालन गर्ने तरिका, कार्यक्रम सञ्चालनको तयारी, स्क्रिप्ट लेखन, आत्मविश्वास, स्पष्ट वक्ता, सार्वजनिक प्रस्तुतिकरण, निडर अभिव्यक्ति, मिठास साथै आफूलाई तयारी बनाउन गर्नुपर्ने लगनशीलता अभ्यास जस्ता व्यावहारिक सीप विकासमा सहयोग पुर्याई उदघोषण कलाको प्रमुख उदेश्य हुने गर्दछ।
यो उदेश्य पूरा गर्न आयोजित कार्यक्रमले दुई दिनसम्म उदघोषणका आधारभूत सिद्धान्त, आवाजको प्रयोग, माइक व्यवस्थापन, कार्यक्रम सञ्चालन अभ्यास तथा प्रस्तुतिकरण सम्बन्धी सैद्धान्तिक र व्यावहारिक पक्षका विषयमा तालिम दिने कार्य भएको थियो।
विद्यार्थीहरूलाई आ-आफ्नो पेट्रोल यानी समूहबाट सामूहिक रूपमा कार्यक्रम सञ्चालनको नमूना तयार पार्न लगाई प्रत्येक पेट्रोलबाट एउटा एउटा उद्घोषण नमूना प्रस्तुत गर्ने कार्य भयो । जसमा प्रत्येक पेट्रोलबाट विद्यार्थीहरूले सक्रिय सहभागिता जनाएका थिए।
यस अभिमुखीकरण तालिमवाट विद्यार्थीहरूको उदघोषण सीपमा राम्रो सुधार भएको पाइयो। साथमा विद्यार्थीहरूमा आत्मविश्वास र नेतृत्व क्षमता विकासमा उल्लेख्य सुधार हुन पुगेको छ ।
त्यस्तै कार्यक्रम सञ्चालनको व्यावहारिक अभ्यास हेर्दा बालबालिकाहरूलाई हामीले समय समयमा अभ्यास गराउँदै सहजीकरण गर्यौ भने उपलब्धि राम्रो हुने देखिएको छ । बालबालिकाहरूमा सामूहिक भावना तथा कार्यक्रमको खाका तयार गर्ने सिप विकास भएको छ।
नामी साप्ताहिक
