काठमाडौं । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै राज्यले निर्वाचन सुरक्षामा व्यापक तयारी गरेको छ । मतदाताले डररहित वातावरणमा मतदान गर्न पाउने सुनिश्चितताका लागि आजदेखि चारै सुरक्षा निकाय एकीकृत रूपमा देशभर परिचालित भएका छन् ।
सरकारद्वारा स्वीकृत ‘प्रतिनिधिसभा सदस्य निर्वाचन एकीकृत सुरक्षा योजना, २०८२’ अनुसार नेपाली सेना, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागलाई संयुक्त रूपमा परिचालन गरिएको हो । निर्वाचनको सम्पूर्ण प्रक्रिया—मतपत्र छपाइदेखि मतगणनासम्म—सुरक्षित राख्ने उद्देश्यसहित यो योजना कार्यान्वयनमा ल्याइएको हो ।
सुरक्षा योजनाअनुसार मतदानस्थलमा तीन तहको सुरक्षा घेरा कायम गरिएको छ । मतदानस्थलको भित्री घेरामा नेपाल प्रहरी र निर्वाचन प्रहरी खटिनेछन् भने दोस्रो घेराको जिम्मेवारी सशस्त्र प्रहरी बलले सम्हाल्नेछ । सबैभन्दा बाहिरी सुरक्षा घेरामा नेपाली सेना परिचालित रहनेछ ।
नेपाली सेनाका अनुसार आजदेखि देशभरका १६५ वटै निर्वाचन क्षेत्रमा सैनिक परिचालन भइसकेको छ । निर्वाचन सुरक्षाका लागि करिब ८० हजार सैनिक जनशक्ति खटाइएको छ । निर्वाचनलाई लक्षित गरी आवश्यक स्थानमा सेनाका अस्थायी ‘बेस’ स्थापना गरिने र संयुक्त गस्ती सञ्चालन गरिने व्यवस्था मिलाइएको छ ।
सेनाले निर्वाचन सुरक्षामा तीन चरणमा भूमिका निर्वाह गर्नेछ । निर्वाचनपूर्व मतपत्र छपाइ र ढुवानी, मतदानका दिन मतदानस्थल र त्यसपछि मतपेटिका ढुवानी तथा मतगणनास्थलको सुरक्षासम्म सेनाको जिम्मेवारी रहनेछ । यसका साथै विमानस्थल, कारागार र अन्य महत्वपूर्ण संरचनाको सुरक्षा पनि सेनाले सम्हाल्नेछ ।
निर्वाचन सुरक्षालाई प्रभावकारी बनाउन नेपाल प्रहरीले ७७ हजार नियमित जनशक्ति परिचालन गर्दैछ । विद्यमान जनशक्ति अपुग भएपछि थप १ लाख ३३ हजार निर्वाचन प्रहरी भर्ना गरिएको छ । मतदानस्थललाई सामान्य, संवेदनशील र अतिसंवेदनशील गरी वर्गीकरण गरेर सुरक्षा व्यवस्था मिलाइएको प्रहरीले जनाएको छ ।
प्रहरीका अनुसार देशभरका १० हजार ९६७ मतदानस्थलमध्ये २ हजार ८४५ सामान्य, ४ हजार ४४२ संवेदनशील र ३ हजार ६८० अतिसंवेदनशील सूचीमा परेका छन् । जोखिमको स्तरअनुसार सुरक्षा घनत्व बढाइएको छ ।
सशस्त्र प्रहरी बल नेपालले ३४ हजार ५७६ नियमित जनशक्ति र १५ हजार ११० निर्वाचन प्रहरी परिचालन गर्ने तयारी गरेको छ । निर्वाचनका क्रममा कुनै पनि अप्रिय घटना हुन नदिन उच्च सतर्कता अपनाइएको र आवश्यक परे १० मिनेटभित्र घटनास्थलमा पुग्ने व्यवस्था मिलाइएको सशस्त्र प्रहरीले जनाएको छ ।
आसन्न निर्वाचनमा १ करोड ८९ लाखभन्दा बढी मतदाता सहभागी हुनेछन् । देशभर २३ हजार ११२ मतदान केन्द्र तोकिएका छन् । राज्यका सबै सुरक्षा संयन्त्र एकीकृत रूपमा परिचालित भएसँगै निर्वाचन स्वच्छ, निष्पक्ष र भयरहित वातावरणमा सम्पन्न हुने विश्वास सरकारको छ ।
प्रकाशित मिति: बुधबार, माघ २१, २०८२ ०९:३७
