काठमाडौं । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले विचार र सिद्धान्तविहीन लोकप्रियतावाद (पपुलिज्म) ले लोकतन्त्र र समाजवादमाथि निरन्तर प्रहार गरिरहेको बताएका छन् ।
सोमबार काठमाडौंमा आयोजित एक कार्यक्रममा सम्बोधन गर्दै संयोजक प्रचण्डले सामाजिक सञ्जाल केन्द्रित ‘स्टन्ट’ र सतही लोकप्रियतावादलाई अन्तर्राष्ट्रिय साम्राज्यवाद तथा भूराजनीतिक चलखेलको नेपाली संस्करणका रूपमा चित्रण गरे । विचार, राजनीतिक सिद्धान्त, इतिहास र विरासतविनै केवल सामाजिक सञ्जालका फण्डा र स्टन्टमार्फत जनताको समर्थन जुटाउने प्रयास भइरहेको उल्लेख गर्दै उनले यसले लोकतान्त्रिक प्रणाली र समाजवादी लक्ष्यलाई कमजोर बनाउने खतरा औँल्याए ।
उनका अनुसार विश्वका विभिन्न देशमा साम्राज्यवादले लोकप्रियतावादलाई उपकरणका रूपमा प्रयोग गर्दै आएको छ र नेपालमा पनि त्यही अन्तर्राष्ट्रिय प्रवृत्ति दोहोर्याउने प्रयास भइरहेको छ । यसलाई उनले लोकतन्त्र र समाजवादमाथिको सुनियोजित आक्रमण तथा भूराजनीतिक खेलको हिस्सा भएको बताए ।
संयोजक प्रचण्डले आफ्नो पार्टी नेपाली कम्युनिस्ट पार्टी (नेकपा) लाई गणतन्त्र, सङ्घीयता र उत्पीडित वर्गका अधिकारका लागि संघर्षरत सबैभन्दा ‘नयाँ’ र वैज्ञानिक विचारधारायुक्त शक्ति भएको दाबी गरे । ‘जेन–जी’ आन्दोलन र त्यसबाट उत्पन्न नयाँ राजनीतिक परिस्थितिलाई सम्बोधन गर्न देशमा बलियो राष्ट्रिय शक्ति आवश्यक रहेको उल्लेख गर्दै उनले वामपन्थी, समाजवादी र देशभक्त शक्तिहरूको एकताबाट पार्टी निर्माण गरिएको जानकारी दिए ।
उनले विभिन्न चरणमा साना–ठूला दल तथा समूहहरू समेटिँदै हाल २६ वटा शक्ति समावेश भएको सन्दर्भ उल्लेख गर्दै यस एकताले देशलाई वैचारिक रूपमा मजबुत बनाउने विश्वास व्यक्त गरे ।
आगामी फागुन २१ गते हुने प्रतिनिधिसभा निर्वाचनलाई लक्षित गर्दै संयोजक प्रचण्डले निर्वाचन नै जनतामा पुग्ने र विशेषतः युवाका माग तथा आकांक्षा सम्बोधन गर्ने प्रभावकारी माध्यम भएको बताए । नयाँ जनअनुमोदित प्रतिनिधिसभाले मात्रै मुलुकले सामना गरिरहेको राष्ट्रिय सङ्कट समाधान गर्न सक्ने धारणा राख्दै पार्टी ‘तारा’ चिह्नसहित निर्वाचनका लागि पूर्ण रूपमा तयार रहेको जनाए ।
कार्यक्रममा उनले वाम एकताको आवश्यकतामा जोड दिँदै युवा पुस्ता र क्रान्तिकारी शक्तिहरूलाई समाजवादी संरचना निर्माणमा सक्रिय रूपमा जुट्न आह्वान गरे । राजनीतिक विश्लेषकहरूले यस सम्बोधनलाई निर्वाचन पूर्वको राजनीतिक ध्रुवीकरण तथा नयाँ दलहरूविरुद्ध नेकपाको वैचारिक हस्तक्षेपका रूपमा हेरेका छन् ।
प्रकाशित मिति: मंगलबार, माघ २७, २०८२ ०७:५२
