काठमाडौं । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ ले नेपाली राजनीतिमा सबैभन्दा नयाँ र वैचारिक रूपमा फरक पार्टी आफ्नो नेतृत्वमा निर्माण भएको नेकपा नै भएको दाबी गरेका छन् । आउँदो प्रतिनिधिसभा सदस्य निर्वाचनलाई लक्षित गर्दै पार्टीको प्रतिवद्धतापत्र सार्वजनिक गर्ने क्रममा उनले यस्तो बताएका हुन् ।
प्रचण्डका अनुसार जेन–जी (Gen-Z) आन्दोलनले उठाएका प्रश्न, असन्तुष्टि र परिवर्तनको चाहनालाई संस्थागत गर्नकै लागि नयाँ राजनीतिक पहलकदमी लिइएको हो । उनले पुराना दल र पुरानो राजनीतिक संरचनाले अब जनताको अपेक्षा सम्बोधन गर्न नसक्ने अवस्थामा पुगेको भन्दै त्यसलाई भत्काएर नयाँ ढंगको पार्टी निर्माण गर्नु अपरिहार्य भएको बताए ।
“जेन–जी आन्दोलनपछि सबैभन्दा पहिला राजनीतिक पहलकदमी लिएर नेपाली कम्युनिस्ट पार्टी बनाउने साहसिक निर्णय हामीले गर्यौँ,” उनले भने, “पुरानो पार्टीको खोल ओढेर होइन, पुरानै संरचना तोडेर नयाँ पार्टी बनाउने पहल गर्ने हामी नै भयौँ ।”
उनले पछिल्ला वर्षहरूमा युवापुस्ताले उठाएको रोजगारी, सुशासन, सामाजिक न्याय र राजनीतिक पारदर्शिताका मुद्दालाई सम्बोधन गर्न नयाँ सोच र नयाँ संगठन आवश्यक भएको जिकिर गरे । नेकपा त्यसैको परिणामस्वरूप जन्मिएको पार्टी भएको उनको भनाइ छ ।
प्रचण्डले पार्टी निर्माणको मितिसमेत उल्लेख गर्दै नेकपा नै देशकै सबैभन्दा नयाँ दल भएको स्पष्ट पारे । “सबैभन्दा नयाँ पार्टी कुन हो भनेर प्रश्न गर्दा जवाफ स्पष्ट छ—नेपाली कम्युनिस्ट पार्टी,” उनले भने, “कार्तिक १९ गते औपचारिक रूपमा निर्माण भएको यो पार्टी नै अहिलेको सबैभन्दा नयाँ राजनीतिक शक्ति हो ।”
उनले आगामी निर्वाचनमा नेकपाले युवामैत्री, परिवर्तनमुखी र जनउत्तरदायी एजेन्डासहित जनतामाझ जाने पनि बताए । नयाँ पुस्ताको विश्वास जितेर राजनीतिमा गुणात्मक परिवर्तन ल्याउने लक्ष्यका साथ नेकपा अघि बढिरहेको प्रचण्डको भनाइ छ ।
प्रकाशित मिति: बुधबार, माघ २८, २०८२ ०८:१२
