काठमाडौँ । हिन्दु धर्मावलम्बीहरूको महान् पर्व महाशिवरात्रि नजिकिँदै जाँदा पशुपतिनाथ मन्दिर क्षेत्रलाई लक्षित गर्दै सरसफाइ, व्यवस्थापन र सेवा–सुविधा सुदृढ पार्ने तयारी तीव्र पारिएको छ । पर्वका अवसरमा लाखौँ श्रद्धालु आउने अनुमान गरिएकाले सम्बन्धित निकाय र सामाजिक संस्थाहरू सक्रिय रूपमा जुटिरहेका छन् ।
यसैक्रममा सामाजिक संस्था क्रियसन नेपालले आज पशुपतिनाथ मन्दिर परिसर तथा आसपासका क्षेत्रमा बृहत् सरसफाइ अभियान सञ्चालन गरेको छ । संस्थाको आयोजनामा सम्पन्न अभियानमा स्वयंसेवक, स्थानीय बासिन्दा, सरसफाइकर्मी र पशुपति क्षेत्र विकास कोषका प्रतिनिधिको सहभागिता रहेको थियो ।
अभियानअन्तर्गत मन्दिर परिसर, आर्यघाट, कैलाश डाँडा आसपासका क्षेत्र तथा साधु–सन्त बसोबास गर्ने स्थानमा विशेष सफाइ गरिएको छ । साथै फोहर व्यवस्थापनलाई व्यवस्थित बनाउन विभिन्न स्थानमा डस्टबिन वितरण गरिएको छ भने सरसफाइमा संलग्न कामदारलाई पहिचान खुल्ने ज्याकेटसमेत प्रदान गरिएको छ ।
पशुपति क्षेत्र विकास कोषका कार्यकारी निर्देशक तथा प्रवक्ता सुभाषचन्द्र जोशीका अनुसार क्रियसन नेपाल विगत केही वर्षदेखि कोषसँग सहकार्य गर्दै पशुपति क्षेत्रको सरसफाइ अभियानमा सक्रिय रूपमा संलग्न हुँदै आएको छ ।
“महाशिवरात्रि नजिकिँदै जाँदा भक्तजनको आवागमन उल्लेख्य रूपमा बढ्ने भएकाले सरसफाइ र व्यवस्थापनलाई प्राथमिकतामा राखिएको छ,” उनले भने, “क्रियसन नेपालले आजको अभियानसँगै महाशिवरात्रिका दिन स्वयंसेवक परिचालन गर्ने प्रतिबद्धतासमेत जनाएको छ ।”
यस वर्षको महाशिवरात्रि पर्वलाई व्यवस्थित, सुरक्षित र मर्यादित रूपमा सम्पन्न गर्न मूल समारोह समितिअन्तर्गत नौवटा विषयगत उपसमिति गठन गरिएको कोषले जनाएको छ । व्यवस्थापन, सुरक्षा, स्वास्थ्य सेवा, सरसफाइ, यातायात, स्वयंसेवक परिचालन, आवास, प्रचार–प्रसार तथा अन्तर–निकाय समन्वयका क्षेत्रमा ती उपसमिति सक्रिय रूपमा खटिएका छन् ।
महाशिवरात्रिका दिन देशका विभिन्न जिल्ला तथा छिमेकी मुलुक भारतबाट समेत ठूलो संख्यामा श्रद्धालु आउने अनुमान गरिएको छ । सोहीअनुसार भीड व्यवस्थापन, सुरक्षा र सेवाप्रवाहलाई विशेष प्राथमिकतामा राखेर तयारी अघि बढाइएको कोषले जनाएको छ ।
प्रकाशित मिति: बिहीबार, माघ २९, २०८२ ०८:०६
