ललितपुर सानै उमेरदेखि तीक्ष्ण बुद्धिका ईश्वरप्रसाद लामिछाने आफ्नो कामप्रति ज्यादै उत्तरदायी र लगनशील व्यक्तिका रूपमा उनको साथीभाई तथा परिवार माझ चिनिन्थे ।
काम गर्ने सिलसिलामा सबैभन्दा पहिलोपटक नेपालका तर्फबाट फेरेट स्काउट कार सम्बन्धी तालिम बेलायतबाट प्राप्त गरेर स्वर्गीय राजा वीरेन्द्रलाई आफूले प्राप्त गरेको तालिमको सम्बन्धमा ब्रिफिङ गर्ने सौभाग्य प्राप्त गरेका उनी अत्यन्त मेहनती र आफ्नो कर्मलाई निष्ठाको रुपमा हेर्ने एउटा कर्मठ व्यक्ति भएको कुरा उनको कार्य कुशलताबाट बुझ्न सजिलै सकिन्छ ।
ललितपुर महानगरपालिका वडा नंबर ४ जावलाखेलमा जन्मेका उनी तत्कालीन शाही नेपाली सेना र हाल नेपाली सेनामा ३७ वर्ष हेलिकप्टर मेन्टनेन्स गर्नका लागि एमई अर्थात् एयरक्राफ्ट मेन्टनेन्स इन्जिनियरका रुपमा कार्यरत भई अवकाश प्राप्त पूर्व प्राविधिक महासेनानी हुन् ।
आफ्नो विषयगत क्षेत्रको कार्य गर्ने क्रममा भिभिआइपी उडान तथा सैनिक विमान सम्भार सेवामा मात्र आफूलाई सीमित नराखी घोडेजात्रा जस्तो राष्ट्रिय महोत्सवको पर्वमा समेत उनले मोटरसाइकल चलाएर खतरनाक र साहसिक प्रदर्शन गरी आफ्नो बहुआयामिक प्रतिभा पस्केर सबैको मन जितेका थिए ।
तीस वटा भन्दा बढी देशहरूको भ्रमण गरिसकेका उनी राष्ट्रसङ्घको शान्ति मिसन अन्तर्गत विभिन्न देशहरूमा र स्वदेशमा पनि पदक तथा तालिम प्राप्त गरी आफ्नो क्षमता र योग्यता सफलतापूर्वक प्रदर्शन गरेर विश्वमा नेपालको नाम उच्च बनाउने व्यक्तित्वको रुपमा पनि परिचित छन् ।
विभिन्न मानवीय संकटहरूमा खोज तथा उद्धार कार्यमा संलग्न रही मानवकल्याण तथा उद्धारमा महत्त्वपूर्ण भूमिका निर्वाह गरेका उनी विसं २०७१ सालमा सेनाबाट अवकाश प्राप्त गरेर पनि अरु जस्तो चुप लागेर नबसी नेपाल र नेपालीका लागि आफूले सकेसम्म आफ्नो क्षेत्रमा योगदान निरन्तर दिइरहने बताउँछन् ।
त्यसैले अहिले पनि उनी विभिन्न एयर प्राइभेट लिमिटेडहरुमा क्यामो मेनेजर र सगरमाथा एयर प्राइभेट लिमिटेडको सञ्चालकका रूपमा कार्यरत छन् ।
नामी साप्ताहिक
प्रकाशित मिति: शनिबार, असोज २४, २०८३ ०९:३१
