भरोसा मानव सम्बन्धको मेरुदण्ड हो । परिवार, मित्रता समाज र राष्ट्र सबै भरोसामै अडिएका हुन्छन्। हरेक प्रतिष्पर्धाहरू भरोसामै अडिएका हुन्छन् जसको पछाडि मेहनत लगनशीलता इमान्दारिता पारदर्शिता र उत्तरदायित्व आवश्यक हुन्छ।
प्रतिष्पर्धाहरू जित्नकै लागि गरिन्छ तर सबैसँग जित हुन्छ भन्ने हुँदैन। हार्ने नभई जित्नेको मूल्याङ्कन नै रहँदैन। पछाडि असफल भइदिनेबाट सफल हुनेले आफ्नो अस्तित्व राख्ने हो । असफलतालाई विश्वासको अन्त्य हुने रूपमा लिनु अत्यन्त गलत हो।
असफल व्यक्ति टुटिरहेको हुन्छ। त्यसका लागि भरोसा दिनुले व्यक्तिलाई लापरवाही र जिम्मेवारीबाट पन्छिन रोक्न सक्छ। असफलताबाट धेरै कुरा सिक्न सकिन्छ । असफलता जीवनको अन्त्य होइन बरु नयाँ सुरुवातको संकेत हो।
मानिस प्राय असफलतासँग डराउँछन्। तर यही असफलताभित्र अपार ऊर्जा लुकेको हुन्छ। सही दृष्टिकोणले हेर्न सके असफलता सफलतातर्फ डोर्याउने सशक्त साधन हो।
सफलताबाट उपलब्धि, खुशी अनि अहिलेको डिजिटल दुनियाँमा आ–आफ्ना पहुँचका मिडियाबाट प्रचारप्रसार व्यक्तिगत रूपमा प्रयोग गरिने सञ्जालहरूमा पोष्ट गरेर बधाई दिएको पाइन्छ । यो पनि एक प्रकारको प्रोत्साहन नै हो।
असफलताले हामीलाई आफ्नो कमजोरी चिनाउँछ गल्तीबाट सिक्ने अवसर दिन्छ आत्मा सुधारको बाटो खोल्छ। सफलताले आत्मसन्तुष्ट बनाउँछ भने असफलताले सङ्घर्ष गर्ने शक्ति जगाउँछ । यही संघर्षबाट धैर्य अनुशासन र आत्मविश्वास जन्मिन्छ।
इतिहास हेर्ने हो भने महान व्यक्तिहरू असफलताबाटै निखारिएका छन्। पटक पटक लडेका तर नहारेका मानिसहरुले नै परिवर्तन ल्याएका छन् असफलता उनीहरुका लागि अवरोध होइन अभ्यासस्थल बनेको छ।
तर असफलता भित्रको ऊर्जालाई नकारात्मक रुपमा लिनु हुँदैन यसलाई सकारात्मक रुपमा लिएर सोच बदल्न दिशा बदल्न लक्ष्य स्पष्ट पार्न सक्नुपर्छ। असफल भएपछि हार मान्नु होइन आफूभित्र लुकेको क्षमतालाई चिनेर मेहनत गर्नु अघि बढ्नु बुद्धिमानी हुनेछ।
सफलता प्राप्त भएपछि धेरै मानिसहरू आफू कहिले नहार्ने भ्रममा पर्छन् सफलताको भरोसा नै कहिले काहीँ असफलताको कारण बन्छ अघिल्लो उपलब्धिले आत्मविश्वास दिन्छ तर अति आत्मविश्वासले सावधानी हराउँछ मेहनत हराउँछ।
निरन्तर मेहनतको अभ्यास कमजोर हुँदै जान्छ । समयसँगै लापरवाही बढ्दै गएपछि असफलतामा रूपान्तरण हुन्छ। त्यसैले सफलता अन्तिम गन्तव्य होइन निरन्तर यात्रा मात्र हो । सफलता भरोसा होइन। निरन्तर प्रयास र आत्मा मूल्याङ्कनमा विश्वास राख्न सके मात्र असफलताबाट बच्न सकिन्छ।
नामी साप्ताहिक
प्रकाशित मिति: शनिबार, फागुन २, २०८२ १०:४७
