काठमाडौं । पूर्वप्रधानमन्त्री तथा नेपाल कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले मध्यपूर्वमा विकसित क्षेत्रीय तनावप्रति गहिरो चिन्ता व्यक्त गर्दै त्यहाँ कार्यरत लाखौं नेपाली नागरिकको सुरक्षालाई उच्च प्राथमिकतामा राख्न सरकारसँग आग्रह गरेका छन्।
सामाजिक सञ्जालमार्फत आफ्नो धारणा सार्वजनिक गर्दै उनले भनेका छन्-इरानमाथि अमेरिका र इजरायलबाट भएका आक्रमण तथा त्यसपछिका घटनाक्रमले समग्र मध्यपूर्व क्षेत्रमा गम्भीर तनाव सिर्जना गरेको उल्लेख गरेका छन्। यस्तो परिस्थितिमा शान्ति, संयमता र कूटनीतिक पहलमार्फत समाधान खोजिनुपर्नेमा जोड दिएका छन्।
प्रचण्डका अनुसार, वर्तमान अवस्थाले विशेषगरी मध्यपूर्वमा रोजगारीका लागि रहेका लाखौं नेपाली श्रमिकको सुरक्षामा प्रत्यक्ष असर पर्न सक्छ। “उनीहरूको सुरक्षा सुनिश्चित गर्नु राज्यको पहिलो दायित्व हो,” उनले भनेका छन्।
उनले नेपाल सरकारलाई उच्च सतर्कता अपनाउन, सम्बन्धित देशहरूसँग सक्रिय कूटनीतिक संवाद गर्न तथा सम्भावित आपतकालीन अवस्थाका लागि प्रभावकारी उद्धार र समन्वय संयन्त्र तयार अवस्थामा राख्न आग्रह गरेका छन्। कुनै पनि नेपाली नागरिकको सुरक्षामा आँच नआओस् भन्नेमा सरकार गम्भीर र जिम्मेवार ढंगले प्रस्तुत हुनुपर्ने उनको जोड छ।
साथै, उनले अन्तर्राष्ट्रिय समुदायलाई धैर्य, संयम र मानवताको पक्षमा उभिन आह्वान गर्दै युद्ध र द्वन्द्वको सट्टा वार्ता र सहमतिमार्फत समाधान खोजिनुपर्ने धारणा व्यक्त गरेका छन्। विदेशमा रहेका नेपालीहरूलाई आधिकारिक सूचनामा मात्र विश्वास गर्न र अफवाहबाट टाढा रहनसमेत उनले अनुरोध गरेका छन्।
प्रकाशित मिति: शनिबार, फागुन १६, २०८२ २०:२१
