काठमाडौं । आगामी फागुन २१ गते हुने निर्वाचनका दिन अत्यावश्यक सेवा प्रदान गर्ने सवारीसाधनलाई छुट्टै सवारी पास आवश्यक नपर्ने निर्वाचन आयोगले जानकारी दिएको छ।
आयोगका प्रवक्ता नारायण प्रसाद भट्टराईका अनुसार फागुन २० गते राति १२ बजेदेखि फागुन २१ गते मतदान गते मतदान सम्पन्न नभएसम्म सवारीसाधन सञ्चालनमा रोक लगाइने भए पनि अत्यावश्यक सेवासम्बन्धी सवारीसाधन भने निर्बाध रूपमा सञ्चालन गर्न पाइनेछ ।
यी सवारीसाधनलाई चल्न छुट
प्रवक्ता भट्टराईका अनुसार निम्न सवारीसाधनले पासबिना सञ्चालनको सुविधा पाउनेछन् । जसमा दमकल, एम्बुलेन्स र शववाहन, खानेपानी, दूध, फलफूल, तरकारी, माछामासु तथा पेट्रोलियम पदार्थ बोकेका सवारीसाधन, दूरसञ्चार सेवा तथा खानेपानी–ढल मर्मतका लागि प्रयोग हुने सवारी,
अस्पतालका चिकित्सक तथा स्वास्थ्यकर्मीलाई निवासदेखि अस्पताल र अस्पतालदेखि निवाससम्म पुर्याउने सवारी,
अन्तर्राष्ट्रिय तथा आन्तरिक हवाई सेवाका यात्रु बोकेका सवारीसाधन (विमानस्थलदेखि घर वा होटलसम्म) सम्म छन्।
यस व्यवस्थाले निर्वाचनका दिन पनि अत्यावश्यक सेवा अवरुद्ध नहुने आयोगको विश्वास छ ।
असहाय र विशेष अवस्थाका नागरिकलाई विशेष सहुलियत
आयोगले शारीरिक रूपमा हिँडडुल गर्न नसक्ने, गर्भवती तथा सुत्केरी महिला, शिशु बोकेकी महिला, किरियापुत्री, अपांगता भएका व्यक्ति, ज्येष्ठ नागरिक तथा मतदाता र तिनका एक जना सहयोगी बोकेका सवारीसाधनलाई समेत अवरोध नगर्न निर्देशन दिएको छ।
यसले मतदानमा सहभागी हुन चाहने सबै नागरिकलाई सहज वातावरण प्रदान गर्ने अपेक्षा गरिएको छ।
कूटनीतिक तथा अनुगमन सवारीको व्यवस्था
नम्बर प्लेटमा ‘सीडी’ उल्लेख भएका कूटनीतिक नियोगका सवारीसाधनलाई पनि प्रचलित नियमअनुसार सञ्चालन गर्न दिइनेछ।
त्यस्तै, आयोगबाट जारी परिचयपत्रका आधारमा प्रयोग हुने पर्यवेक्षकका सवारीसाधनहरू परिचयपत्रमा उल्लेखित क्षेत्रभित्र मात्र सञ्चालन गर्न पाइने स्पष्ट व्यवस्था गरिएको छ।
यसैगरी, राष्ट्रिय मानवाधिकार आयोगले निर्वाचन अनुगमनका लागि प्रयोग गर्ने सवारीसाधन तथा प्रेस पास प्राप्त सञ्चारकर्मीका सवारीसाधनका हकमा पनि छुट्टै सवारी पास आवश्यक नपर्ने गरी व्यवस्था मिलाउन आयोगले गृह मन्त्रालयमार्फत नेपाल सरकारलाई सिफारिस गरिसकेको जनाएको छ।
गृह मन्त्रालयबाट सोहीअनुसार पत्राचार भइसकेको जानकारी पनि प्रवक्ता भट्टराईले दिएका छन्।
दुरुपयोग नगर्न आयोगको आग्रह
निर्वाचन आयोगले तोकिएको मापदण्डबमोजिम मात्रै सवारीसाधन प्रयोग गर्न र दुरुपयोग नगर्न सबै सरोकारवालालाई आग्रह गरेको छ।
“निर्वाचनको शान्त, मर्यादित र व्यवस्थित वातावरण कायम राख्दै अत्यावश्यक सेवा प्रवाहमा कुनै अवरोध नआओस् भन्ने हाम्रो उद्देश्य हो,” प्रवक्ता भट्टराईले भने। आगामी फागुन २१ गते हुने मतदानलाई सुरक्षित, व्यवस्थित र सहभागीपूर्ण बनाउन आयोगले सुरक्षा निकाय तथा सम्बन्धित निकायहरूसँग समन्वय गर्दै आवश्यक तयारी तीव्र पारेको जनाएको छ।
