झापा क्षेत्र नम्बर ५ अन्तर्गत पर्ने अरुणोदय आधारभूत विद्यालय जुरोपानी ८ मा मिति २०८२ फागुन २१ गते विहिवार खटिँदै गर्दा त्यहाँ देखिएको मतदाताहरूको सामाजिक भावना, सहयोगी मन र यसैसँग जोडिएको राजनीतिक व्यवहार हामीले प्रयोग गर्ने सञ्चारका माध्यमहरूमा देखिने केही असामाजिक भावनाहरूभन्दा धेरै नै फरक थियो ।
पहिला जस्तो व्यक्तिमा एकअर्कालाई गालीगलोज गर्ने पार्टीगत स्वार्थ राख्दै मतदातासँग कानेखुसी गर्ने, एकअर्कालाई आक्षेप लगाउने परिपाटीहरू पूर्ण रुपमा बन्द थिए । शारीरिक रुपमा अशक्त व्यक्तिहरूलाई स्वतःस्फुर्तरूपमा आफ्नो पालो छोडेर उहाँहरुलाई प्राथमिकता दिने संस्कार देख्दा एकदमै खुशी लाग्यो।
हामीले सामाजिक सञ्जालमा देखेका जातिय धार्मिक मतभेदहरू सिमित मान्छेहरुसँग मात्र छन्। हाम्रो समाज एकदमै सहयोगी छ भन्ने उदाहरण स्पष्ट देखिन्थ्यो । वास्तवमै शिक्षा समाजको ऐना हो । सचेत युवाहरू समाज तोड्न होइन जोड्न चाहन्छन्। नेपाली समाज परम्परागत रूपमा सहकार्य आपसी सहयोग सहिष्णुता र सामूहिकताको भावनाले भरिएको छ।
गाउँ समाजमा मेलापात, परोपकार र सामाजिक एकताले नेपाली समाजमा बलियो सामाजिक भावना, विपत् समस्या वा विकासका काममा एक–अर्कालाई सहयोग गर्ने संस्कारबाट झल्किन्छ । यो संस्कार मैले अरुणोदय केन्द्रलाई हेर्दै गर्दा पूर्णरूपमा समाजमा झल्किएको सामाजिक भावना र सहयोगी पनि स्पष्ट रूपमा व्यवहारमा देखिन्थ्यो।
यस सामाजिक भावनाले राजनीतिमा पनि प्रभाव पारेको छ। हिजो जस्तो अरुले देखाएका आश्वासनहरू मान्ने भन्दा पनि स्वविवेक निर्णय गर्ने क्षमता व्यक्तिहरूमा देखिन थालेको छ । नागरिकहरू सामाजिक न्याय समानता र अधिकारको पक्षमा निर्धक्क आवाज उठाउन थालेका छन्। यो लोकतान्त्रिक प्रणालीलाई बलियो बनाउने आधार हो । र जनभावना अनुसार निर्णय गर्ने बलियो दबाब हो।
यसरी नेपाली नागरिकमा रहेको सामाजिक भावना समाज एकताको आधार मात्र नभई राजनीतिक चेतना र लोकतन्त्रलाई सुदृढ बनाउने महत्वपूर्ण आधार हो । लोकतन्त्रको सुन्दर उदाहरण पनि हो ।
याे पनि :
नामी साप्ताहिक
प्रकाशित मिति: शनिबार, फागुन ३०, २०८२ १६:०३
