२१ फागुनको प्रतिनिधिसभा सदस्यको निर्वाचनले नयाँ मुहार फेरेको छ। ३५ बर्षदेखि उही पुरानै नेपाली कांग्रेस, नेकपा एमाले, माओवादी तथा मधेश दलका नेताहरुको फोस्रा भाषण अनि धुसी परेका आश्वासन मात्र पाउंदैआएका नेपाली जनताले उनीहरुलाई लात मारेका छन्।
नयाँ पुस्ताको चाहना र सोच बमोजिम नेपाली राजनीतिमा नयाँ पुस्ता यो निर्वाचनले दिएको छ। प्रचण्ड जस्ता एक दुईजना पुराना अनुहार परास्त गर्न नसकेपनि अधिकाँस नयाँ जोशका अनुहार नै आएको छ। सधैं एक नंबरमा रहने गरेका कांग्रेस, एमालेलाई सोतर पार्ने कोशिश ३ बर्षअघि मात्र स्थापना भएको राष्ट्रिय स्वतन्त्र पार्टीवाट भएको छ।
यो निर्वाचनमा राष्ट्रिय स्वतन्त्र पार्टीले दुई तिहाइको बहुमत ल्याउन सफल भएको छ। भदौ २३ र २४ गतेको जेन-जी आन्दोलनको चाहना र सोच बमोजिम राष्ट्रिय स्वतन्त्र पार्टीले दुई तिहाइको बहुमत पाएको हो। पुराना पार्टी तथा बूढा नेताहरुको हैकमवादी प्रवृति अनि व्यापक भ्रष्टाचारको कारण देश बर्बाद परिरहेको एवम् लाखौ युवाहरु खाडीमा जानुपरेको यथास्थितिलाई मध्यनजर गरेर यसपटक नेपाली जनताले राष्ट्रिय स्वतन्त्र पार्टी र उनको घण्टी चिन्हलाई ठूलो विश्वास गरेको छ।
विश्वासको बहुमत नै दिएको छ। राष्ट्रिय स्वतन्त्र पार्टीको नेतृत्वमा बहुमतको बलियो सरकार बन्ने निश्चित भएको छ। प्रतिनिधिसभा निर्वाचनअन्तर्गत प्रत्यक्षतर्फका सबै १६५ सिटको नतिजा आइसकेको छ । समानुपातिकको मतगणना पनि लगभग अन्तिम चरणमा पुगेको छ। निर्वाचन आयोगद्वारा जारी मंगलबार ९ बजेको तथ्यांकअनुसार एक करोड ६ लाख ३० हजार १४८ सदर मत गणना भएको छ।
जसमा ५० लाख ९२ हजार ५७२ मत राष्ट्रिय स्वतन्त्र पार्टी(रास्वपा)ले प्राप्त गरेको छ। दोस्रो स्थानमा रहेको नेपाली कांग्रेसले १७ लाख २८ हजार ३९१ मत प्राप्त गर्दा तेस्रो स्थानको नेकपा एमालेले १४ लाख ३८ हजार ४९३ मत पाएको छ।
यस्तै नेपाली कम्युनिस्ट पार्टीले ७ लाख ८९ हजार ९०८ मत पाउँदा अन्य दुई दलले पनि समानुपातिकतर्फ थ्रेसहोल्ड कटाएका छन्। जसमा हर्कराज राई(साम्पाङ) नेतृत्वको श्रम संस्कृति पार्टी र राष्ट्रिय प्रजातन्त्र पार्टी छन्। हालसम्मको समानुपातिकको गणनामा श्रम संस्कृतिले ३ लाख ७२ हजार ४२९ मत प्राप्त गर्दा राप्रपाले तीन लाख २८ हजार ३७ मत पाएको छ।
अन्य दलले थ्रेसहोल्ड कटाउने सम्भावना निकै न्युन छ। निर्वाचन आयोगको प्रारम्भिक रिपोर्टअनुसार समानुपातिकतर्फ एक करोड नौ लाख ७७ हजार ७११ मत खसेको छ। युवाको चाहना भ्रष्टाचारमुक्त देश अनि स्वदेशमा नै उचित शिक्षा, स्वास्थ्य र रोजगार भएको कारण यसलाई मध्यनजर गरेर राष्ट्रिय स्वतन्त्र पार्टी नेतृत्वको बहुमत सरकारले यसतर्फ देशलाई अगाडि बढाउने जिम्मा यो निर्वाचनले दिएको छ।
नेपाली जनताले बहुमतवाट राष्ट्रिय स्वतन्त्र पार्टीलाई यो मौका तथा अवसर दिएको छ। यसलाई पार्टीभन्दा माथि जनताको लागि भनेर जनताको सेवामा लगाउनु अति आवश्यक छ। पुराना पार्टी र तिनका नेताले गरेको जस्तो गल्ती यो पार्टी र यो पार्टीका नेताले गर्नु हुदैन। गरेमा सत्तोसराप लाग्नेछन्।
प्रकाशित मिति: शनिबार, फागुन ३०, २०८२ १७:३६
