मिलन काफ्ले
पाल्पा । पाल्पाको रम्भा गाउँपालिका–४ अन्तर्गत रहेको अमर आधारभूत विद्यालयको अभिभावक भेलाले विद्यालय व्यवस्थापन समिति तथा शिक्षक अभिभावक संघको पुनर्गठन गरेको छ।
कृष्णबहादुर सिंजाली अध्यक्ष रहेको निवर्तमान विद्यालय व्यवस्थापन समिति विघटन गर्दै ओमकुमारी सारूको अध्यक्षतामा सात सदस्यीय विद्यालय व्यवस्थापन समिति तथा अनिता दर्लामीको अध्यक्षतामा ११ सदस्यीय शिक्षक अभिभावक संघ सर्वसम्मत रूपमा पुनर्गठन गरिएको हो।
नवगठित विद्यालय व्यवस्थापन समितिमा सदस्यका रूपमा भगवती खनाल, बिन्दु काफ्ले र तुलसा सारू रहेका छन्। पदेन सदस्यमा वडा अध्यक्ष कृष्णबहादुर रायमाझी, शिक्षक प्रतिनिधिमा मधुसुदन खनाल तथा सदस्य सचिवमा प्रधानाध्यापक ईश्वरीप्रसाद बस्याल रहेका छन्।
शिक्षा नियमावलीको संशोधित कार्यविधिअनुसार चयन गरिएको व्यवस्थापन समितिमा चार जना सदस्य तथा शिक्षक अभिभावक संघका ११ जना सदस्य सबै महिला रहेका छन्। यो केवल संयोग हो वा समाजको वास्तविकता भन्ने विषय बहसको विषय बन्न सक्छ। तथापि, अमर विद्यालयको इतिहासमा यति ठूलो संख्यामा महिला प्रतिनिधित्वसहितको विद्यालय व्यवस्थापन समिति तथा शिक्षक अभिभावक संघ गठन भएको यो पहिलोपटक हो।
भेलाका प्रमुख अतिथि तथा रम्भा गाउँपालिकाका प्रवक्ता एवं वडा नं. ४ का वडा अध्यक्ष कृष्णबहादुर रायमाझीले नवगठित समितिका पदाधिकारीलाई बधाई तथा सफल कार्यकालको शुभकामना व्यक्त गर्दै पदेन सदस्यका रूपमा आफ्नो जिम्मेवारी प्रभावकारी रूपमा निर्वाह गर्ने प्रतिबद्धता व्यक्त गरे।
रायमाझीले महिला नेतृत्वले विद्यालयलाई थप प्रगतिको दिशातर्फ अगाडि बढाउने विश्वास व्यक्त गर्दै गाउँमा युवा तथा सक्रिय उमेर समूहका पुरुषहरूको संख्या न्यून हुँदा विकास निर्माण तथा अन्य सामाजिक गतिविधिमा समेत प्रत्यक्ष असर परेको बताए।
त्यसैगरी, नवगठित विद्यालय व्यवस्थापन समितिकी अध्यक्ष ओमकुमारी सारूले विद्यालयको शैक्षिक गुणस्तर अभिवृद्धि तथा कुशल व्यवस्थापनमा आफू सदैव प्रतिबद्ध रहने बताइन्।
भेलाले सोही दिन पाँच सदस्यीय विद्यालय सल्लाहकार समिति समेत गठन गरेको छ।
प्रकाशित मिति: आइतबार, जेठ १०, २०८३ ०६:३२
