काठमाडौं। समाजसेवा र गायन कला क्षेत्रमा निरन्तर पुर्याउँदै आएको उल्लेखनीय योगदानको उच्च कदर गर्दै समाजसेवी गायिका सरिता महर्जनलाई लायन्स क्लब अफ काठमाडौं महिमा, कम्युनिटी पिस, लियो तथा शुभतारा गरी चारवटा लायन्स क्लबका चार्टर प्रेसिडेन्टहरूको संयुक्त आयोजनामा भव्य सम्मान गरिएको छ।
कार्यक्रममा लायन्स क्लब अफ काठमाडौं महिमाका चार्टर प्रेसिडेन्ट गणेश आचार्य, कम्युनिटी पिसका चार्टर प्रेसिडेन्ट भीमरत्न बज्राचार्य, लियो क्लबका प्रेसिडेन्ट प्रज्वल देवजु र शुभताराका चार्टर प्रेसिडेन्ट राजेश हिमालय तथा शुभताराकी प्रेसिडेन्ट सुशीला श्रेष्ठलगायतले खादा, सम्मानपत्र तथा मायाको चिनो प्रदान गर्दै महर्जनको योगदानप्रति उच्च सम्मान व्यक्त गरेका थिए।
सम्मान कार्यक्रममा वक्ताहरूले सरिता महर्जन केवल एक सफल गायिका मात्र नभई संगीतलाई समाजसेवाको माध्यम बनाउँदै सामाजिक उत्तरदायित्व निर्वाह गरिरहेकी प्रेरणादायी व्यक्तित्व भएको उल्लेख गरे। संगीतले मानिसको मन जित्ने मात्र होइन, समाजलाई सकारात्मक सन्देश दिन सक्ने शक्तिशाली माध्यम भएको र महर्जनले यही माध्यमलाई मानव सेवासँग जोडेर उदाहरणीय भूमिका निर्वाह गरिरहेको उनीहरूको भनाइ थियो।
लायन्स क्लबजस्ता अन्तर्राष्ट्रिय सेवामूलक संस्थाले समाजमा निस्वार्थ योगदान दिने व्यक्तित्वलाई सम्मान गर्नु भनेको सेवाको संस्कृतिलाई थप सशक्त बनाउने अभियान पनि हो। यस्ता सम्मानले योगदानकर्तालाई थप ऊर्जा दिनुका साथै नयाँ पुस्तालाई पनि समाज र राष्ट्रप्रति जिम्मेवार बन्न प्रेरित गर्ने विश्वास आयोजक चारैवटा लायन्स क्लवका अभिभावक लायन गणेश आचार्यले व्यक्त गरेका छन्।
सम्मानपछि गायिका सरिता महर्जनले आफूले प्राप्त गरेको सम्मानलाई व्यक्तिगत उपलब्धिभन्दा पनि संगीतप्रेमी, शुभेच्छुक तथा सामाजिक सेवामा साथ दिने सबैप्रतिको सम्मानका रूपमा लिएको बताइन्। आगामी दिनमा पनि कला र समाजसेवालाई सँगसँगै अघि बढाउँदै मानव सेवामा अझ सक्रिय रहने प्रतिबद्धता उनले व्यक्त गरिन्।
समाज परिवर्तनका लागि कला र सेवाभाव दुवै उत्तिकै आवश्यक हुने सन्देश दिएको उक्त कार्यक्रमले सिर्जनशील कलाकारलाई सम्मान गर्ने संस्कृतिको विकासमा समेत सकारात्मक योगदान पुर्याएको सहभागीहरूको धारणा थियो। सेवा, समर्पण र सिर्जनशीलतालाई एउटै मञ्चमा उभ्याउँदै सम्पन्न भएको यो सम्मान समारोहले समाजमा असल कार्यको मूल्याङ्कन अझ सशक्त रूपमा हुनुपर्ने सन्देशसमेत प्रवाह गरेको छ।
प्रकाशित मिति: शनिबार, असार २०, २०८३ ०६:०७
