उदयपुर । रौतामाई गाउँपालिका-७ मुर्कुचीस्थित श्री नमूना माध्यमिक विद्यालयमा अध्ययन गर्ने टाढा-टाढाका विद्यार्थीको आवागमन सहज बनाउन आगामी आर्थिक वर्षदेखि विद्यालय बस सञ्चालन गरिने भएको छ।
बस सञ्चालनका लागि कोशी प्रदेश सरकार र रौतामाई गाउँपालिकाबाट गरी ४५ लाख रुपैयाँ बजेट सुनिश्चित भएपछि प्रक्रिया अघि बढाइएको विद्यालयले जनाएको छ ।
विद्यालयका प्रधानाध्यापक खड्ग थापामगरका अनुसार आगामी आर्थिक वर्षका लागि कोशी प्रदेश सरकारबाट २५ लाख रुपैयाँ र रौतामाई गाउँपालिकाबाट २० लाख रुपैयाँ गरी कुल ४५ लाख रुपैयाँ बजेट विनियोजन गरिएको छ।
‘धेरै प्रयासपछि विद्यालय बस सञ्चालनका लागि आवश्यक बजेट सुनिश्चित भएको छ। अब आवश्यक प्रक्रिया पूरा गरी छिट्टै बस सञ्चालनको काम अघि बढ्छ,’ प्रधानाध्यापक थापा मगरले भने, ‘विद्यालयमा प्राविधिक धारसहित करिब एक हजार विद्यार्थी अध्ययनरत छन्।’
उनका अुनसार तीमध्ये धेरै विद्यार्थी टाढाका गाउँबाट दैनिक विद्यालय आउँछन्। कतिपय विद्यार्थीले विद्यालय पुग्न एक घण्टासम्म पैदल यात्रा गर्नुपर्ने बाध्यता रहेको उनले बताए । ‘बस सञ्चालन भएपछि टाढाका विद्यार्थीलाई विद्यालय ल्याउन र घरसम्म सुरक्षित रूपमा पुर्याउन सहज हुनेछ । यसले विद्यार्थीको नियमित उपस्थितिमा वृद्धि गर्नुका साथै पढाइ छाड्ने समस्या पनि कम गर्न सहयोग पुग्ने अपेक्षा गरेका छौं,’ उनले थप्दै भने।
विद्यालयमा सामान्य शिक्षासँगै प्राविधिक धारअन्तर्गत सिभिल इन्जिनियरिङ विषयको अध्ययनसमेत सञ्चालन हुँदै आएको छ। प्राविधिक शिक्षा अध्ययन गर्न आउने विद्यार्थीहरू पनि विभिन्न वडाबाट दैनिक आवतजावत गर्ने भएकाले बस सेवा आवश्यक रहेको विद्यालयको भनाइ छ।
विद्यालय बस सञ्चालनका लागि आवश्यक बजेट सुनिश्चित गर्न कोशी प्रदेश सरकारका सामाजिक विकास मन्त्री रामप्रसाद महत्तोको विशेष पहल रहेको बताइएको छ । यसैगरी पूर्व मन्त्री तथा प्रदेशसभा सदस्य नारायणबहादुर बुर्जा मगर, रौतामाई गाउँपालिकाका अध्यक्ष वीरेन्द्र मगर, उपाध्यक्ष भूपेन्द्र थापा, विद्यालय व्यवस्थापन समितिका अध्यक्ष मनोज राना, गाउँपालिकाको शिक्षा शाखा, विद्यालय व्यवस्थापन समिति, शिक्षक, कर्मचारी तथा विद्यालय परिवारको निरन्तर समन्वय र सक्रिय प्रयासबाट योजना सफल भएको विद्यालयले जनाएको छ।
स्थानीय अभिभावकले विद्यालय बस सञ्चालनको निर्णयलाई स्वागत गरेका छन्। उनीहरूका अनुसार दुर्गम बस्तीका विद्यार्थीलाई सुरक्षित र नियमित रूपमा विद्यालय पुर्याउन बस सेवा प्रभावकारी हुने विश्वास गरिएको छ । वर्षायाममा खोलानाला र कच्ची सडकका कारण विद्यार्थीले भोग्ने सास्ती पनि बस सञ्चालनपछि कम हुने अपेक्षा गरिएको छ ।
विद्यालय प्रशासनले बस सञ्चालनका लागि बजेट सुनिश्चित गर्न सहयोग गर्ने प्रदेश सरकार, रौतामाई गाउँपालिका, जनप्रतिनिधि, विद्यालय व्यवस्थापन समिति, शिक्षा शाखा, शिक्षक, कर्मचारी तथा प्रत्यक्ष-अप्रत्यक्ष रूपमा सहयोग गर्ने सबैप्रति आभार व्यक्त गरेको छ।
विद्यालयको भनाइमा बस सेवा सञ्चालनसँगै टाढाका बस्तीका विद्यार्थीको शिक्षामा पहुँच थप सहज हुने, नियमित उपस्थितिमा सुधार आउने र विद्यालयको समग्र शैक्षिक गुणस्तर अभिवृद्धिमा समेत सकारात्मक योगदान पुग्ने विश्वास गरिएको छ।
