साविकमा सुदूरपश्चिमाञ्चल विकास क्षेत्रको सदरमुकाम दिपमयल रहेको डोटी जिल्ला हाल सुदूर पश्चिम प्रदेशमा पर्दछ। सिलगढी सदरमुकाम रहेको यस जिल्लाको पूर्वमा अछाम र सुर्खेत, पश्चिममा डडेल्धुरा र बैतडी, उत्तरमा बझाङ तथा दक्षिणमा कैलाली जिल्लाहरु पर्दछन्। भौगोलिक दृष्टिकोणले विकट त्यसमा पनि दुर्गम डोटीको बडीकेदार गाउँपालिकामा कसरी विकास निर्माणका कामहरु कसरी भएका छन् त ? यिनै डोटीको बडीकेदार गाउँपालिका वडा-४ का वडा अध्यक्ष बीरेन्द्र बहादुर कोटकेनीसंग नामी साप्ताहिकका लागि निशान बुढाथोकीले लिएको अन्तरवार्ताको सारसंक्षेप –
योजना अनुसार कतिको कामहरु भएका छन् ?
वास्तवमा भन्ने हो भने डोटी जिल्ला भौगोलिक दृष्टिकोणले विकट जिल्ला हो। त्यसमा पनि बडीकेदार गाउँपालिका अझ विकट गाउँपालिका अन्र्तगत पर्दछ। यो पाँच वर्षको अवधिमा हामीले विकास निर्माणका धेरै कामहरु सम्पन्न गरिसकेको अवस्था छ। हामीले स्वास्थ्य, शिक्षा, खानेपानी, सडकदेखि लिएर सबै कामहरु सम्पन्न भएका छन्। स्थानिय सर्वसाधारणको पनि त्यत्तिकै साथ र सहयोग पाएका छौं।
स्थानिय सर्वसाधारणहरुको मुख्य समस्याहरु के के छन् त ?
खासमा भन्नुपर्दा स्थानिय सर्वसाधारणको मुख्य समस्या भनेको खानेपानी र सडक नै हो। यी सारा समस्याहरु समाधान भइसकेको अवस्था छ।
महिलाहरुको लागि कस्तो खालको तालिमको व्यवस्था गर्नुभएको छ ?
महिला सशक्तिकरण सम्बन्धि तालिम, जेन्डर सम्बन्धि तालिम त्यसैगरी सिपमूलक तालिमहरु, घरेलु हिंसा सम्बन्धि तालिमहरु दिएका छौं।
भौगोलिक दृष्टिले विकट डोटी, त्यसमा पनि बडीकेदार गाउँपालिका विकट गाउँपालिकामा पर्दछ, पहिला र अहिले कस्तो खालको परिवर्तन भएका छन् ?
वास्तवमा भन्नुपर्दा पहिला र अहिले यो पाँच वर्षको अवधिमा धेरै नै परिवर्तन भएका छन्। सडकको धेरै नै विजोग थियो, पहिले् एक ठाउँबाट अर्को ठाउँमा पुग्न नै घण्टौं लाग्थ्यो भने अहिले सबै बाटोहरु ग्राभेल भएका छन्। यातायातको पनि सुविधा छ। विकास निर्माणका थुप्रै कामहरु सम्पन्न भएका छन्। हामीले यो पाँच वर्षको अवधिमा गर्न बाँकी भनेको बिद्युतको काम हो त्यो पनि छिटै नै काम सम्पन्न हुनेछ।
विगतमा धेरै वर्ष स्थानिय तह जनप्रतिनिधि विहिन थियो। अहिले स्थानिय जनताले आफ्नो अभिभावक पाएका छन्। विगतमा स्थानिय तहमा जनप्रतिनिधिहरु नहुँदा त्यतिखेर स्थानिय निकाय भन्ने गरिन्थ्यो, र त्यो स्थानिय निकायमा धेरै जनतासंग जोडिएका विकास निर्माणका कामहरु भन्दा अहिले स्थानिय तह जुन राज्यको पुर्नसंरचना भइसकेपछि निर्वाचनको समयमा जनतासंग जुन किसिमको वाचा गरेका थियौं।
अब सिंहदरबारको अधिकार घरघरमा हुन्छ र स्थानिय तहमा विकास निर्माणका कामदेखि लिएर स्थानिय जनताहरुको सेवा सुविधा कुराहरुमा विकेन्द्रिकरण गरेर स्थानिय तहलाई बलियो बनाउनु पर्छ भनेर हामीले निर्वाचनको समयमा पनि भनेका थियौं र राज्यको पुर्नसंरचनाले पनि त्यो कुरालाई स्थापित गरेको यो वर्तमान समयमा स्थानिय तहको भूमिका धेरै रहेको छ।
तथापि स्थानिय तह ऐन अन्र्तगत जति धेरै जुन हिजोको दिनमा भने अनुसार जनताको लागि सेवा सुविधा पर्याप्त मात्रामा पुर्याउन नपुगेको अनुभव हामीले गरेका छौं। म के भन्न चाहन्छु भने स्थानिय तहलाई जति धेरै अधिकार सम्पन्न र मजबुत बनाउन सक्यौं भने स्थानिय तहमा नेपाली जनताले त्यति नै मात्रामा छिटो छरितो रुपमा सेवा सुविधा पाउन सक्छन्। त्यसकारण हिजोको दिनमा भन्दा आज स्थानिय तहमा काम गर्न सजिलो भएको छ।
नामी साप्ताहिकबाट
