मुलुकलाई विकास र समृद्धिको बाटोमा डोर्याउने एउटा महत्वपूर्ण आधार राजनीति पनि हो । राजनीतिबाटै महिलाले सिंगो मुलुक हाक्न सक्छन् अनि मुलुकलाई समृद्ध बनाउन पनि। थुप्रै मुलुकका आर्थिक विकासका अनुभव र समय समयमा गरिएका विभिन्न अनुसन्धानले महिलाको सक्रिय सहभागिता विना आर्थिक तथा सामाजिक विकासको लक्ष्य हासिल हुन सक्दैन भन्ने प्रमाणित गरिसकेको छ।
सधै निडर स्वभाव, निरन्तर सर्वसाधारणको सेवामा खटिरहने, सबैलाई समान व्यवहार गर्ने, विकास निर्माणका काममा दिन रात नभनि अहोरात्र लागिरहने, सकारात्मक तरिकाबाट समाज परिवर्तन गर्ने महिला बडीकेदार गाउँपालिका डाेटीकी उपाध्यक्ष ईन्द्रा बोहरा भाटसंग नामी साप्ताहिकको लागि निशान बुढाथोकीले लिएको अन्तरवार्ताको सारसंक्षेप–
अवसर पाए महिलाले चुल्हो चौकोदेखि नीति निर्माणको तहसम्म काम गर्न सक्छन् भन्ने कुरालाई कत्तिको मान्नु हुन्छ ?
एक दम सही भन्नुभयो, अवसर पाए महिलाले जस्तो सुकै काम पनि गर्न सक्छन् । तर सोचे जति सजिलो त पक्कै पनि छैन। किनभने हामीले सिकेर आएको संस्कार र चाल, चलन, रितिरिवाज जस्तो छ त्यही परिवेशमा छौं हामी। परिवर्तन भएकै छैन। परिवर्तन त धेरै कुरामा भएको छ, तर कुनै पनि कुरा तुरुन्तै परिवर्तन हुँदैन त्यसको लागि समय लागिहाल्छ।
पित्तृप्रधान समाजमा महिलालाई अझै पनि दोश्रो दर्जाको रुपमा हेर्ने चलन छ, महिलाले काम गर्न सक्दिन कि, अथवा पुरुषभन्दा माथि जान्छन् कि भन्नेहरु पुरुष होइनन्, महिला नै हुन्, त्यसकारण हाम्रो जस्तो मुलुकमा परिवर्तन हुन समय लाग्छ, तर अवसर पाए जस्तो सुकै काम पनि गर्न सक्छन्। चुनौतीलाई अवसरका रुपमा काम गर्नुपर्छ ।
देशमा आधा भन्दा बढी जनसंख्या महिलाको छ, तर पनि अवसरको कमीले अगाडि आउन सकेका छैनन्, महिलालाई कतिको गाह्रो हुन्छ काम गर्न, अगाडि बढ्न ?
महिलालाई अगाडि बढ्न गाह्रो नै हुन्छ, अवसर पाउन पनि गाह्रो छ। अवसर पाए पनि विभिन्न खालका समस्याहरु आइपर्छन्। किनभने हामी महिलाहरु हिजो चौघेरामा सिमित थियौं, आज चौघेरा त नाघेका छौं तर पनि समस्याहरु प्रसस्त छन्। हामीले हाम्रो घर परिवार सबैलाई खुशी बनाएर बाहिर निस्किनु पर्ने हुन्छ। यसको अर्थ यो होइन कि हामीलाई पुरुषले सहयोग गर्दैनन् भन्ने। मलाई पनि धेरै नै सहयोग प्राप्त भएको छ। परिवर्तनशील समयमा पाइला टेकेपनि हामी अलि पुरानो संस्कारमा हुर्किएको हुनाले घरको काम पुरुषले गर्नु हुन्न भन्ने मान्यता छ। कतिपय अवस्थामा हामी महिला आफ्नै कारणले पनि पछाडि परेका छौं।
योजना अनुसार कत्तिको कामहरु भएका छन् ?
डोटी जिल्ला भौगोलिक दृष्टिकोणले विकट जिल्ला हो त्यसमा पनि बडीकेदार गाउँपालिका अझ विकट गाउँपालिका अन्र्तगत पर्दछ। यो ५ वर्षको अवधिमा हामीले विकास निर्माणका धेरै कामहरु सम्पन्न गरिसकेको अवस्था छ। हामीले स्वास्थ्य, शिक्षा, खानेपानी, सडकदेखि लिएर सबै कामहरु सम्पन्न भएका छन्। स्थानिय सर्वसाधारणको पनि त्यत्तिकै साथ र सहयोग पाएका छौं।
भौगोलिक दृष्टिले विकट डोटी, त्यसमा पनि बडीकेदार गाउँपालिका विकट गाउँपालिकामा पर्दछ, पहिला र अहिले कस्तो खालको परिवर्तन भएका छन् ?
पहिला र अहिले यो ५ वर्षको अवधिमा धेरै नै परिवर्तन भएका छन्। सडकको धेरै नै विजोग थियो, पहिले् एक ठाउँबाट अर्को ठाउँमा पुग्न नै घण्टौं लाग्थ्यो भने अहिले सबै बाटोहरु ग्राभेल भएका छन्। यातायातको पनि सुविधा छ। विकास निर्माणका थुप्रै कामहरु सम्पन्न भएका छन्। हामीले यो ५ वर्षको अवधिमा गर्न बाँकी भनेको बिद्युतको काम हो त्यो पनि छिट्टै नै काम सम्पन्न हुनेछ।
नामी साप्ताहिकबाट
