काठमाडौ । कोरोनाको जोखिम कम भएसँगै विश्व सम्पदा सूचीमा सूचीकृत हनुमानढोका दरबार क्षेत्रमा विदेशी पर्यटकको चहलपहल बढ्न थालेको छ।
कोरोना जोखिम कम हुँदै गएपछि गत साउन महिनादेखि हनुमानढोका दरबार क्षेत्र विदेशी पर्यटकका लागि खुला गरिएको थियो।
साउन महिनामा दक्षिण एसियाली देशका ११ र अन्य देशका ३८ गरी ४९ पर्यटक हनुमानढोका दरबार क्षेत्रमा आएका थिए।
भदौ महिनामा अन्य देशका ७१ र दक्षिण एसियाली देशका ३० गरी १०१ पर्यटक आएको काठमाडौँ महानगरपालिका हनुमानढोका दरबार क्षेत्र संरक्षण कार्यक्रमका लेखा अधिकृत सुन्दरकाजी थुयाजुले जानकारी दिए।
असोज महिनामा भने हनुमानढोका दरबार क्षेत्रमा विदेशी पर्यटकको सङ्ख्या ह्वात्तै बढेको थियो। असोजमा अन्य देशका ४७२ र दक्षिण एसियाली देशका १४९ गरी ६२१ पर्यटकले हनुमानढोका दरबार क्षेत्रको भ्रमण गरेका छन्।
असोजको तुलनामा कात्तिकमा दरबार क्षेत्रमा विदेशी पर्यटकको सङ्ख्या ३ गुणाले बढ्यो। कात्तिकमा अन्य देशका १ हजार ५१८ र दक्षिण एसियाली देशका ५८५ गरी २ हजार १०३ विदेशी पर्यटक दरबार क्षेत्रमा आएका छन्।
कोरोना भाइरसको नयाँस्वरुप ओमिक्रोन फैलन थालेकाले मङ्सिरमा भने पर्यटकको सङ्ख्या केही घटेको छ।
मङ्सिरमा अन्य देशका १ हजार २२० र दक्षिण एसियाली देशका ६५३ गरी १ हजार ८७३ पर्यटकले हनुमानढोका दरबार क्षेत्रको अवलोकन गरेका छन्।
हनुमानढोका दरबार क्षेत्र भ्रमण गर्न आउने सार्क र बिम्स्टेक देशका नागरिकका लागि १५० शुल्क लिइन्छ। अन्य देशका नागरिकलाई भने १ हजार लिने गरिएको लेखा अधिकृत खुयाजुले जानकारी दिए।
पर्यटकबाट आर्थिक वर्ष २०७५/२०७६ मा १८ करोड ७२ लाख २५ हजार ४५० आम्दानी भएको थियो कोरोनाका कारण आव २०७६/२०७७ मा ११ करोड ९९ लाख ६० हजार ५६० शुल्क उठेको छ।
कोरोनाको सबैभन्दा धेरै प्रभाव आव २०७७/२०७८ मा परेको देखिन्छ। यो वर्ष १३ लाख ५८ हजार ४५० मात्र शुल्क उठेको कार्यालयले जनाएको छ।
चालु आर्थिक वर्ष मङ्सिर मसान्तसम्म ३६ लाख शुल्क उठेको छ। विदेशी नागरिकलाई टिकट दिन कार्यालयले ६ वटा काउण्टरको व्यवस्था गरेको छ।
जुद्ध सालिक, झोँछे, दशअवतार मन्दिरअघि, सिंहसत्तल, प्याफल र मक्खन पशुपति मन्दिर छेउमा गरी ६ वटा काउण्टरले विदेशी पर्यटकलाई टिकट दिएर मात्र हनुमानढोका दरबार क्षेत्र प्रवेश गराउँछन्।
प्रकाशित मिति: बुधबार, पुस १४, २०७८ १६:२९
