काठमाडौ । धितोपत्र बजारमा शेयर कारोबार मापक नेप्से परिसूचक आज पनि दोहोरो अङ्कले ओरालो लागेको छ।
नेपाल स्टक एक्सचेञ्जका अनुसार कारोबार मापक नेप्से २२.०६ अङ्कले ओरालो लागेर २ हजार ८१३.५२ मा ओर्लेको हो।
ठूला कम्पनीको शेयर कारोबार मापन गर्ने सेन्सेटिभ परिसूचक ३.५१ अङ्कले ओरालो लागेर ५२८.९९ मा ओर्लेको छ। नेप्सेको ओरालो यात्रासँगै कारोबार रकमसमेत ओरालो लागेको छ। कूल २२३ कम्पनीको ६५ लाख २० हजार ६२८ कित्ता शेयर ३ अर्ब ४७ करोड ११ लाख ९ हजार १८२ मूल्यमा खरिद बिक्री भएका छन्।
बुधबारको कारोबारपछि बजार पूँजीकरण ३९ खर्ब ७६ अर्ब ५५ करोड ८ लाख ७० हजारको आसपास रोकिएको छ। नेप्सेका अनुसार कारोबार भएका १३ उपसमूहको शेयर मूल्यमा नै गिरावट आएको छ।
बैंकिङतर्फ १२.४२, व्यापार ३९.२५, होटल तथा पर्यटन २.४४, विकास बैंक ४६.२७, जलविद्युत् ३२.७२, वित्त २४.८५, निर्जीवन बीमा १९८.७५, उत्पादन १५.०३, अन्य ३.६७, लघुवित्त ५०.०४, जीवन बीमा १५१.०८, सामूहिक लगानी कोष ०.१२ र लगानी ०.९६ अङ्कले ओरालो लागेका हुन्।
कारोबारका आधारमा अरुण भ्याली हाइड्रो पावर शीर्ष स्थानमा रहेको छ। सो कम्पनीको १८ करोड ६१ लख ६९ हजार ७६५ बराबरको कारोबार भए भने नेपाल दूरसञ्चार कम्पनी १४ करोड ५९ लाख ५७ हजार २१७, नेशनल हाइड्रो पावर १४ करोड ४७ लाख १३ हजार ३९८, नेपाल पूर्वाधार बैंक १४ करोड १३ लाख ४० हजार ४५२ र एचआइडिसिएल ११ करोड २ लाख ६३ हजार ७४४ बराबरको कारोबार भई शीर्ष पाँचभित्र पर्न सफल भए।
नेप्सेका अनुसार लिबर्टी इनर्जी ३.०८, आरम्भ चौतारी लघुवित्त २.८०, जनउत्थान सामुदायिक लघुवित्त १.९७, लाइफ इन्स्योरेन्स कम्पनी १.८७ र मैलङ खोला जलविद्युत् आयोजनाका लगानीकर्ताले १.८५ प्रतिशतले कमाएभने बुद्ध भूमि नेपाल हाइड्रोपावर ६.६४, नेपाल एसबिआई बैंकको ऋणपत्र ३.७५, नेपाल हाइड्रो डेभलपर्स ३.३५, सप्तकोशी डेभलपमेन्ट बैंक ३.२७ र विन नेपाल लघुवित्तका लगानीकर्ताले ३.०६ प्रतिशतले गुमाएका छन्।
प्रकाशित मिति: बुधबार, माघ २६, २०७८ १८:१८
