काठमाडौ । डिशहोमले “रगतका कथाहरु’’ शिर्षकमा सिरिज बनाउने भएको छ ।
आफ्ना ग्राहकहरुको लागि आफ्नै एक्स्लुसिभ च्यानलहरुमार्फत नयाँ-नयाँ मनोरञ्जनात्मक कार्यक्रमहरु निर्माण तथा प्रशारण गर्दै आएको डिशहोमले “रगतका कथाहरु’’ शिर्षकमा नयाँ सिरिज निर्माण गर्ने लागेको हो ।
“रगतका कथाहरु’’ शिर्षकमा नयाँ सिरिज निर्माण गर्ने हुने यस सिरिजको पहिलो सिजनमा १३ श्रृङ्खलाहरु हुनेछन् र प्रत्येक श्रृङ्खलामा फरक-फरक कथाबस्तु समेटिने छन् ।
डिश मिडिया नेटवर्क र दृश्यालय सिनेमा प्रा.लि.को संयुक्त प्रस्तुतिमा निर्माण हुन लागेको श्रृङ्खलाको सम्झौतापत्रमा डिश मिडिया नेटवर्कका तर्फबाट प्रवन्ध निर्देशक सुदीप आचार्य र लेखक /निर्देशक किरण बिकले उक्त सम्झौता पत्रमा हस्ताक्षर गरेको हो।
“हामी अलिक फरक तरिकाको कथाहरु टिभीका दर्शकलाई दिन चाहन्थ्यौँ त्यसैबेला किरण जी केहि फरक कथा छन् भन्दै आउनु भयो। पटक पटकको छलफल र पहिलो एपिसोड हेरे पछि हामीले खोजे जस्तै फरक खालको कन्टेन्ट बन्ने भएपछि डिशहोम दृश्यालय सिनेमासँग सहकार्य गर्न तयार भएको हो’’ प्रवन्ध निर्देशक सुदीप आचार्यले भने ।
यस सिरिज देशका विभिन्न ठाउँमा छायाँङ्कन हुने बताइएको छ । लेखक/निर्देशक किरण बिकका अनुसार “समाजमा नभनिएका, लुकाइएका र भन्न पनि अफ्ठ्यारा लाग्ने लभ सेक्स एण्ड रिलेशनका हार्डकोर कथाहरु हामी दर्शकहरुलाई देखाउनेछौँ, नेपाली टिभीका दर्शकहरुलाई यो श्रृङ्खलाले केहि भिन्न स्वाद दिने विश्वास लिएको छु।’’
यस सिरिजमा युविना भट्टराई, सहारा कोइराला, राजकुमार दर्जी, प्रेम अधिकारी जेनिथ, नुतन, अस्मिता खनाल लगायतको अभिनय रहनेछ भने गोपाल आचार्य सह–निर्देशनमा रहनेछन् त्यसैगरी स्क्रिनप्ले सावित्री रसाइली र समानता गौतमको हुनेछ।
प्रकाशित मिति: सोमबार, फागुन २३, २०७८ २२:१९
