सर्लाही । सर्लाहीको बरहथवा नगरपालिकाको प्रमुख पदमा नेकपा एमालेकी कल्पनाकुमारी कटुवाल विजयी भएकी छन्।
कटुवाल बरहथवाका निवर्तमान नगर प्रमुख देवानन्द महतोलाई दोब्बर बढी मतले पराजित गर्दै नगर प्रमुखमा निर्वाचित भएकी छन्।
उनले १२ हजार २ सय ७३ मत प्राप्त गरेरे विजयी बनेकी हुन् भने उनका निकटतम प्रतिस्पर्धी नेकपा माओवादी केन्द्रका महतोले ६ हजार ६ सय ६६ मत प्राप्त गरेका थिए।
नगर प्रमुखमा निर्वाचित कटुवाल २ हजार ७४ सालको निर्वाचनमा भने माओवादीका महतोसँग नै पराजित भएकी थिइन्। नगर प्रमुखकै अर्का प्रत्यासी नेपाली कांग्रेसका विगुप्रसाद चौधरीले ६ हजार ५५ मत पाएका छन्।
नेकपा एमालेबाट निर्वाचित कटुवाल सर्लाही जिल्लामा पहिलो महिला नगर प्रमुख समेत बनेकी छन्। यसअघि विसं. २०७४ सालको निर्वाचनमा लालबन्दी, हरिवन, हरिपुर र ईश्वरपुर गरी चार वटा नगरपालिका जितेको एमालेले यो पटक बरहथवामा मात्रै जित निकालेको हो।
बरहथवा नगरपालिकाको उप प्रमुख पदमा पनि नेकपा एमाले नै विजयी भएको छ । एमालेका रामबाबु प्रसाद साह ९ हजार ९ सय १ मत ल्याएर विजयी भएका छन् भने उनका निकटतम प्रतिस्पर्धी नेपाली कांग्रेसकी गंगा दाहालले ७ हजार १ सय १९ मत मात्रै प्राप्त गरेकी छन् ।
निवर्तमान नगर उप प्रमुख नेकपा माओवादी केन्द्रकी सीतादेवी माझी तेस्रो बनेकी छन्। उनले ६ हजार ३ सय १४ मत प्राप्त गरेकी थिइन्।
सर्लाही जिल्लाका २० पालिकामध्ये नेपाली कांग्रेसले १२, माओवादी केन्द्रले ४, जसपाले २, नेकपा एमाले र लोसपाले १–१ पालिकामा जित हात पारेका छन् ।
प्रकाशित मिति: सोमबार, जेठ ९, २०७९ ०९:०६
