ललितपुर । नेपाल कम्युनिष्ट पार्टी (एमाले) ललितपुर क्षेत्र नं ३ प्रतिनिधिसभा सदस्य पदका उम्मेदवार अमृत खड्काले आफू सांसद पदमा निर्वाचित भएसँगै मुलुकको वनक्षेत्रबाट रोजगारी सिर्जना गर्ने वातावरण तयार गर्ने वचनवद्धता व्यक्त गरेको छ।
सो काम अघि बढेसँगै युवाहरुलाई वैदेशिक रोजगारीमा जार्नुपर्ने बाध्यता अन्त्य हुने उल्लेख गर्दै उम्मेदवार खड्काले उक्त योजना महत्वपूर्ण रहेको वताएको हो ।
यहाँका वनमा विभिन्न जडिबुटी उत्पादन गर्ने काम युवालाई दिन सके सो बाट ठूलो रकम प्राप्त गर्न सकिने खड्काले बताएका हुन् । उनले भने, “मुलुकको कूल वनक्षेत्रमा रिठ्ठा तथा कफी एवम् अल्लो हुँदै लोक्ता जस्ता बस्तु उत्पादन गरी विभिन्न सामग्री निर्माण गर्न सकिन्छ।” सो जडिबुटीबाट निर्मित सामग्रीका लागि युवालाई परिचालन गरी मुलुकमै रहन पाउने वातावरण तयार गर्ने खड्काको मुख्य ध्यये रहेको छ ।
मुलुकमा लोपोन्मुख भएका जडिबुटीलाई खेतिमा रुपान्तरण गर्न सके सो को संरक्षणसँगै कैयौँ युवाले वैदेशिक रोजगारीमा जानु नपर्ने समस्याको पनि हल हुने खड्काले जिकीर गरे ।
“नेपालमै रहेर उत्पादनशिल हुन पाउनु हरेक युवाको राष्ट्रनिर्माण तर्फको दायित्वमा समेत बृद्धि हुनेछ”, खड्काले थपे। आफू हाल एक सफल व्यवसायी रहँदा जानेका सिप तथा ज्ञानलाई इच्छुक युवामा छरि सोबाट आर्थिक उत्थानमा ठूलो भूमिका अघि बढाउने लक्ष्य रहेको खड्काले जिकीर गरेका छन् ।
खड्का हाल नेपाल निर्यात व्यवसायी महासंघका महासचिव सँगसँगै नेकपा एमाले बागमती प्रदेश कमिटी सदस्य छन्। उनी २०४५ सालमा अनेरास्ववियुमा संगठित थिए । २०४६ सालको आन्दोलनमा घाइते भएका खड्का २०५४ सालमा सैंबु गाउँविकास समितिका अध्यक्ष भइसकेका छन् ।
सोसँगै खड्का गाउँविकास समिति राष्ट्रिय महासङ्घ ललितपुरका सचिव तथा २०७५ सालमा नेपाल उनी फेल्ट उत्पादक तथा निर्यात सङ्घका अध्यक्ष एवम् नेपाल हस्तकला महासंघका उपाध्यक्ष हुँदै नेपालको उत्पादन सामर्थ्य र निर्यात क्षेत्रका विज्ञ हुन्।
नेपालको उत्पादनमा वृद्धि, रोजगारी वृद्धि र निर्यात वृद्धिको विषयमा अनुसन्धानात्मक लेख रचनाहरु प्रकाशित गरिरहने खड्काले सन् २०१३ मा उल ड्रायर ब्यागको विकास गरी यूरोप अमेरिकामा ख्याती कमाएको थियो ।
स्नातक तहसम्मको शैक्षिक योग्यता हासिल गरिसकेका खड्का हाल कल्पना क्राफ्टको प्रोपाइटर हुन् ।
प्रकाशित मिति: बुधबार, कात्तिक २, २०७९ २०:१४
