दोलखा । सत्ता गठबन्धनतर्फ नेकपा (माओवादी केन्द्र) का उम्मेदवार गंगा कार्की दोलखाको प्रतिनिधि सभा सदस्य निर्वाचनमा विजयी भएका छन्।
निर्वाचित सदस्य कार्कीले एमाले उम्मेदवार बालकृष्ण सिवाकोटीलाई झिनो मतान्तरले पराजित गर्दै जित निकालेको हो ।
प्रतिनिधि सभा सदस्यको एक मात्र निर्वाचन क्षेत्र रहेको दोलखामा कार्कीले सिवाकोटीलाई ३ सय १७ मतान्तरले पराजित गरेका हुन्।
कूल ३६ हजार ७ सय ९९ मत प्राप्त गरेर प्रतिनिधि सभा सदस्यमा कार्कीले विजयी भएका हुन् भने उनका निकटतम् प्रतिद्वन्द्वी सिवाकोटीले ३६ हजार ४ सय ८२ मत प्राप्त गरेका छन्।
प्रतिनिधिसभा तर्फको मतगणना सकिएको र रुजु गर्ने कार्य भइरहेको दोलखाका प्रमुख निर्वाचन अधिकृत डिल्लीरत्न श्रेष्ठले जानकारी दिए। श्रेष्ठका अनुसार अहिले घोषणा भने भएको छैन तर गणनाचाँहि सकिएको छ।
दोलखामा कूल १ लाख ६१ हजार चार सय ५० मतदाता रहेका थिए भने १४ राजनीतिक दलका र ७ स्वतन्त्र गरी २१ उम्मेदवार चुनावी मैदानमा सहभागी भएका थिए।
मतगणनाअनुसार कूल मत ८५ हजार ३ सय ८८ खसेको थियो भने त्यहाँ ३ हजार ४ सय ७९ मत बदर भएको छ ।
दोलखा प्रदेश सभा १ मा कांग्रेस उम्मेदवार कुन्दनराज काफ्ले र प्रदेशसभा-२ मा नेकपा एमालेका भरत केसी विजयी भएका छन्।
दोलखामा समानुपातिक गणना भने जारी नै रहेको मुख्य निर्वाचन अधिकृत श्रेष्ठले बताए।
प्रकाशित मिति: सोमबार, मंसिर १९, २०७९ ०९:४०
