काठमाडौ । सातवटै प्रदेश सभाको ३ सय ३० निर्वाचन क्षेत्रको प्रत्यक्षतर्फको परिणाम सार्वजनिक भएको छ ।
प्रदेशसभाको प्रत्यक्षतर्फ नेपाली कांग्रेस ४ र नेकपा एमाले २ प्रदेशमा ठूलो दल बनेको छ । मधेस, बागमती, गण्डकी र सुदूरपश्चिम प्रदेशमा कांग्रेस पहिलो पार्टी बन्दा एमाले प्रदेश नं १ र लुम्बिनी प्रदेशमा पहिलो बनेको छ ।
कर्णाली प्रदेशमा प्रत्यक्षतर्फ कांग्रेस र नेकपा (माओवादी केन्द्र) समान ९/९ स्थानमा विजयी भएका छन् ।
प्रदेशसभामा १ सय ११ स्थानमा विजयी हुँदै नेपाली कांग्रेस ठूलो दल बनेको छ । नेकपा (एमाले) ले ९१, नेकपा (माओवादी केन्द्र) ले ५४, नेकपा (एकीकृत समाजवादी) ले १५, राष्ट्रिय प्रजातन्त्र पार्टी र जनता समाजवादी पार्टी नेपालले ११/११, लोकतान्त्रिक समाजवादी पार्टीले ९, जनमत पार्टी र नागरिक उन्मुक्ति पार्टीले ७/७ तथा नेपाल मजदुर किसान पार्टी र हाम्रो स्वाभिमान पार्टीले १/१ स्थानमा जित हासिल गरेका छन् । प्रदेशसभामा १२ स्वतन्त्र उम्मेदवार विजयी भएको निर्वाचन आयोगले जनाएको छ ।
प्रदेश नं १ को प्रत्यक्षतर्फको ५६ सिटमा कांग्रेस १७, एमाले २५, माओवादी केन्द्र ९ र एकीकृत समाजवादी २ तथा मधेस प्रदेशको ६४ सिटमा कांग्रेस १३, एमाले १५, जसपा ९, लोसपा ७, जनमत पार्टी ६, माओवादी केन्द्र र एकीकृत समाजवादी ४/४ स्थानमा विजयी भएका छन् । मधेस प्रदेशसभामा ६ स्वतन्त्र उम्मेदवार विजयी भएका छन् ।
बागमती प्रदेशसभाका ६६ सिटमा कांग्रेस २५, माओवादी केन्द्र १४, एमाले १३, राप्रपा ७, एकीकृत समाजवादी ५ तथा नेमकिपा र हाम्रो नेपाली पार्टी १/१ स्थानमा तथा गण्डकी प्रदेशसभाका ३६ सिटमा कांग्रेस १८, एमाले १२, माओवादी ५ र एक स्वतन्त्र उम्मेदवार विजयी भएका छन् ।
लुम्बिनी प्रदेशसभाका ५२ क्षेत्रमा एमाले १८, कांग्रेस १७, माओवादी ५, राप्रपा, जसपा, लोसपा र नागरिक उन्मुक्ति पार्टी २/२, जनमत पार्टी १ तथा ३ स्वतन्त्र उम्मेदवार निर्वाचित भएका छन् ।
कर्णाली प्रदेशसभाका २४ सिटमा कांग्रेस र माओवादी ९/९ एमाले ५ र स्वतन्त्र १ तथा सुदूरपश्चिम प्रदेशसभाका ३२ क्षेत्रमा कांग्रेस १२, माओवादी केन्द्र ८, नागरिक उन्मुक्ति पार्टी ५, एमाले र एकीकृत समाजवादी ३/३ तथा एक स्वतन्त्र उम्मेदवार विजयी भएका छन् ।
