काठमाडौ । निर्वाचन आयोगले मङ्सिर ४ गते सम्पन्न प्रतिनिधिसभा तथा प्रदेशसभा सदस्य निर्वाचनअन्तर्गत समानुपातिक प्रणालीको अन्तिम मतपरिणाम सार्वजनिक गरेको छ ।
समानुपातिक निर्वाचन प्रणालीमा सात राजनीतिक दलले मात्र ‘थ्रेस होल्ड’ अर्थात् खसेको कूल सदर मतको न्यूनतम तीन प्रतिशत कटाएका छन् ।
प्रतिनिधिसभामा सात राजनीतिक दलले ९२ लाख ७१ हजार ७ सय १२ मत प्राप्त गरेका छन् । यजसअनुसार नेकपा (एमाले) ले कूल सदर मतको ३० दशमलव ६९ प्रतिशत मत प्राप्त गरी ३४ सिट प्राप्त गरेको छ भने नेपाली कांग्रेसले २९ दशमलव २९ प्रतिशत मत प्राप्त गरी ३२ सिट पाएको छ ।
यस्तै नेकपा (माओवादी केन्द्र) ले कूल सदर मतको १२ दशमलव ६८ प्रतिशत मत प्राप्त गरी १४ सिट प्राप्त गरेको छ । राष्ट्रिय स्वतन्त्र पार्टीले १२ दशमलव १९ प्रतिशत मत प्राप्त गरी १३ सिट पाएको छ भने राष्ट्रिय प्रजातन्त्र पार्टीले ६ दशमलव ३५ मत प्राप्त गरी ७ सिट, जनता समाजवादी पार्टीले ४ दशमलव ५४ मत प्राप्त गरी ५ सिट र जनमत पार्टीले ४ दशमलव २६ मत प्राप्त गरी ५ सिट प्राप्त गरेको छ ।
सातै प्रदेशको मतपरिणामअनुसार निर्वाचनमा सहभागी दललाई आयोगले सिट बाँडफाँट गरेको छ ।
प्रदेश नम्बर १
नेकपा (एमाले) ले प्राप्त गरेको ३८ दशमलव ५५ प्रतिशत मत प्राप्त गरी १५ सिट प्राप्त गर्दा नेपाली कांग्रेसले ३२ दशमलव ६१ प्रतिशत मत प्राप्त गरी १२ सिट प्राप्त गरेको छ ।
यस्तै राष्ट्रिय प्रजातन्त्र पार्टीले ११ दशमलव ५ प्रतिशत मतले ४, नेकपा (माओवादी केन्द्र) ले १० दशमलव ५ प्रतिशतले ४ सिट, जनता समाजवादी पार्टी, नेपालले ३ दशमलव ५ प्रतिशतले एक, नेकपा (एमाले)ले ३ दशमलव २४ प्रतिशत मतले १ सिट प्राप्त गरेको छ । यस प्रदेशमा छ राजनीतिक दलले मात्र ‘थ्रेस होल्ड’ कटाएका छन् ।
मधेस प्रदेश
यस प्रदेशमा १० राजनीतिक दलले ‘थ्रेस होल्ड’ कटाएका छन् । नेपाली कांग्रेसले २० दशमलव ४९ प्रतिशत मत प्राप्त गरी ९ सिट पाउँदा नेकपा (एमाले) ले १८ दशमलव मतले ८ सिट प्राप्त गरेको छ ।
जनमत पार्टीले १६ दशमलव ८६ मत प्राप्त गरी ७ सिट प्राप्त गरेको छ भने जनता समाजवादीले १५ दशमलव ३ प्रतिशत मतले ७ सिट प्राप्त गरेको छ ।
त्यसैगरी नेकपा (माओवादी केन्द्र) ले ९ दशमलव २६ प्रतिशत मत प्राप्त गरी ४ सिट, नेकपा (एस) ले ५ दशमलव ८३ प्रतिशत मत प्राप्त गरी ३ सिट र लोकतान्त्रिक समाजवादी पार्टी नेपालले ५ दशमलव ८ प्रतिशत मत प्राप्त गरी २ सिट प्राप्त गरेको छ ।
यस्तै राष्ट्रिय प्रजातन्त्र पार्टीले ३ दशमलव ३३ प्रतिशत मतले १, नेपाल सङ्घीय समाजवादी पार्टीले २ दशमलव ५७ मतले १ र नागरिक उन्मुक्ति पार्टीले २ प्रतिशत ५५ दशमलव मतले १ सिट प्राप्त गरेको छ ।
बागमती प्रदेश
यस प्रदेशमा सात राजनीतिक दलले ‘थ्रेस होल्ड’ कटाएका छन् । नेकपा (एमालले) ३२ दशमलव ३९ प्रतिशत मत प्राप्त गरी १४ सिट प्राप्त गर्दा नेपाली कांग्रेसले २७ दशमलव २४ प्रतिशत मत पाई १२ सिट प्राप्त गरेको छ ।
त्यस्तै नेकपा (माओवादी केन्द्र)ले १५ दशमलव ५५ प्रतिशत मत प्राप्त गरी ७ र राष्ट्रिय प्रजातन्त्र पार्टीले १४ दशमलव ८३ प्रतिशत मतले ६ सिट प्राप्त गरेको छ ।
यता, नेकपा (एस) ले ३ दशमलव ७४ प्रतिशत मत र नेपाल मजदुर किसान पार्टीले ३ दशमलव ६८ प्रतिशत मत प्राप्त गरी समान २ सिट प्राप्त गरेका छन् । हाम्रो नेपाली पार्टीले २ दशमलव ५७ प्रतिशत मतले १ सिट संङ्ख्या प्राप्त गरेको छ ।
गण्डकी प्रदेश
गण्डकी प्रदेशमा चार राजनीतिक दलले ‘थ्रेस होल्ड’ कटाएर प्रदेशसभा सदस्य प्राप्त गरेका छन् । नेकपा (एमाले) ले ३९ दशमलव ०३ प्रतिशत मतले १० र नेपाली कांग्रेसले ३७ दशमलव ०८ प्रतिशत मतले ९ सिट प्राप्त गरेको छ । नेकपा (माओवादी केन्द्र)ले १२ दशमलव ४ प्रतिशत मतले ३ सिट र हाम्रो नेपाली पार्टीले ६ दशमलव ३१ प्रतिशत मतले २ सिट प्राप्त गरेको छ ।
लुम्बिनी प्रदेश
यस प्रदेशमा १० राजनीतिक दलले ‘थ्रेस होल्ड’ कटाएका छन् । नेकपा (एमालले) ले ३२ दशमलव १२ प्रतिशत मतले ११ सिट र नेपाली कांग्रेसले २८ दशमलव १३ प्रतिशत मतले १० सिट सङ्ख्या प्राप्त गरेको छ ।
नेकपा (माओवादी केन्द्र) ले ११ दशमलव १६ प्रतिशत मतले ४, राष्ट्रिय प्रजातन्त्र पार्टीले ७ दशमलव १७ प्रतिशत मतले २, नागरिक उन्मुक्ति पार्टीले ७ दशमलव ०६ प्रतिशत मतले दुई र जनमत पार्टीले ४ दशमलव ५९ प्रतिशत मतले २ सिट प्राप्त गरेको छ ।
त्यसैगरी जसपा नेपालले ३ दशमलव ४२ प्रतिशत मतले १, नेकपा (एस) ले २ दशमलव ४ प्रतिशत मतले १, लोसपा नेपालले २ दशमलव १२ प्रतिशत मतले १ र राष्ट्रिय जनमोर्चाले १ दशमलव ८४ प्रतिशत मतले १ सिट प्राप्त गरेको छ ।
कर्णाली प्रदेश
कर्णाली प्रदेशमा छ राजनीतिक दलमध्ये पाँच दलले सिट प्राप्त गरेका छन् । नेकपा (एमाले) ले ३२ दशमलव ७१ प्रतिशत र नेपाली कांग्रेसले ३० दशमलव ३६ प्रतिशत मतले समान ५ सिट सङ्ख्या प्राप्त गरेका छन् ।
नेकपा (माओवादी केन्द्र) ले २४ दशमलव ४७ प्रतिशत मतले ४ सिट प्राप्त गरेको छ । यस्तै नेकपा (एस) ले ६ दशमलव ३७ प्रतिशत मत र राप्रपाले ४ दशमलव ४७ प्रतिशत मतले १/१ सिट प्राप्त गरेको छ ।
सुदूरपश्चिम प्रदेश
यस प्रदेशमा छ राजनीतिक दलले ‘थ्रेस होल्ड’ कटाएका छन् । नेकपा (एमाले) ले ३२ दशमलव २३ प्रतिशत मतले ७ सिट सङ्ख्या प्राप्त गरेको छ । यस्तै नेपाली कांग्रेसले ३१ दशमलव ६३ प्रतिशत मतले ७ सिट सङ्ख्या प्राप्त गरेको छ ।
नेकपा (माओवादी केन्द्र) ले १४ दशमलव २५ प्रतिशत मतले ३ सिट र नागरिक उन्मुक्ति पार्टीले ११ दशमलव ५६ प्रतिशत मतले २ सिट प्राप्त गरेको छ ।
यता नेकपा (एस) ले ५ दशमलव १४ प्रतिशत मत र राप्रपाले ५ दशमलव १९ प्रतिशत मतले १/१ सिट प्राप्त गरेको छ।
