कास्की । गण्डकी प्रदेश नीति तथा योजना आयोगका नवनियुक्त उपाध्यक्ष र दुई जना सदस्यहरुले पद तथा गोपनियताको शपथ लिएको छ।
मुख्यमन्त्री तथा मन्त्रिपरिषद्को कार्यालयमा आयोजित कार्यक्रममा मुख्यमन्त्री खगराज अधिकारीले आयोगका उपाध्यक्ष डा गिरिधारी शर्मा पौडेललाई शपथ गराएको हो ।
मुख्यमन्त्री अधिकारीको उपस्थितिमा उपाध्यक्ष शर्मा पौडेलले नवनियुक्त सदस्यद्धय डा सुवास पौडेल र डा शान्ताकुमारी खत्रीलाई पद तथा गोपनियताको शपथ गराएको छ ।
यही माघ १५ गतेको प्रदेश मन्त्रिपरिषद्को बैठकले प्रदेश नीति तथा योजना आयोगमा उपाध्यक्ष र सदस्यहरु नियुक्तिको निर्णय गरेको थियो।
यसअघि प्रदेशका संस्थापक मुख्यमन्त्री पृथ्वीसुब्बा गुरुङका पालामा पनि पौडेल योजना आयोगको उपाध्यक्ष नियुक्त भएको थियो । स्याङ्जाको आँधिखोला गाउँपालिका स्थायी घर भएका डा पौडेल यसअघि युएनडिपीमा कार्यरत थिए ।
आयोगको सदस्यमा नियुक्त डा अधिकारी यसअघिका मुख्यमन्त्री कृष्णचन्द्र नेपाली पोखरेल नेतृत्वको सरकारको पालामा समेत सदस्य थिए । अधिकारी तनहुँको म्याग्दे गाउँपालिका निवासी हुन् ।
यसैगरी अर्का सदस्य डा खत्री कास्कीको मादी गाउँपालिका-१२ निवासी हुन् । उनी पृथ्वीनारायण क्याम्पसमा समाजशास्त्र तथा मानवशास्त्र अध्यापन गर्थे । शपथ समारोहमा प्रदेश सरकारमा मन्त्रीहरु, मन्त्रालयका सचिव तथा कर्मचारीहरुको उपस्थिति रहेको थियो ।
गत पुस २५ गते मुख्यमन्त्रीमा नियुक्त अधिकारीले मन्त्रिपरिषद्लाई पूर्णता दिएसँगै नीति तथा योजना आयोग र मुख्य न्यायाधिवक्ताको नियुक्ति गरेको हो ।
प्रकाशित मिति: बुधबार, माघ १८, २०७९ १५:२८
