काठमाडौँ । नेपाली कांग्रेसका संस्थापक नेता जननायक बीपी कोइरालाको स्मृतिमा दीप प्रज्ज्वलन गरिएको छ। बीपी कोइरालाको ४१ औँ स्मृति दिवसका अवसरमा नेपाली कांग्रेस काठमाडौँ क्षेत्र नं ४ ले पुरातत्विक तथा धार्मिक महत्वको इतिहासकालिन बैष्णवीदेवी टुडाँलदेवी मन्दिर परिसरमा दीप प्रज्ज्वलन गरेको हो।
कार्यक्रममा काठमाडौँ क्षेत्र नं ५ का प्रतिनिधिसभा सदस्य प्रदीप पौडेलले बिपीको विचार र चिन्तनलाई कांग्रेसले सँधै अगाडि बढाउने बताए । उनले बीपी कोइराला प्रधानमन्त्री भएर १७ महिनामा गरेको काम आजसम्म कुनै सरकारले गर्न नसकेको बताए ।
“आर्थिक दृष्टिकोण विनाको राजनीतिक अगाडि बढ्न नसक्ने बिपीको विचार थियो, बीपी कोइरालाको सरकारलाई अपदस्थ नगरेको भए नेपालको आर्थिक उन्नति धेरै अगाडि बढ्थ्यो”, उनले भने ।
नेपाली कांग्रेस काठमाडौँ महानगरपालिका वडा नं ४ का सभापति रामप्रसाद न्यौपानेले बीपीको स्मृति दिवसलाई विभिन्न तरिकाले मनाउने क्रमअनुसार दीप प्रज्ज्वलन गरिएको बताए । राष्ट्रियता, प्रजातन्त्र र समाजवादका प्रवर्द्धक बीपी राष्ट्रवादी राजनेता भएको उनको भनाइ थियो ।
प्रकाशित मिति: सोमबार, साउन ८, २०८० २१:३५
