कैलाली । नेकपा (एकीकृत समाजवादी) का अध्यक्ष माधवकुमार नेपालले मुलुकमा संविधान मास्ने षड्यन्त्र भइरहेको बताएको छ।
समाजवादी जागरण अभियान अन्तर्गत आज १२ औं दिन सुदूरपश्चिमको टीकापुरमाआयोजित सभालाई सम्बोधन गर्दै अध्यक्ष नेपालले धरान, सर्लाही र नेपालगञ्जका साम्प्रदायिक घटनाले त्यस्तो संकेत गरेको बताएको हो।
अध्यक्ष नेपालले भने, ‘सामाजिक सद्भावलाई भड्काउने केही कोशिस भइरहेको छ । त्यस्ता प्रयत्नहरुलाई हामीले असफल पार्नुपर्छ।’ उनले जनताको बीचमा प्रेम, आपसी सद्भाव वृद्धि गर्नका लागि आफ्नो पार्टीले महत्वपूर्ण भूमिका खेल्नु पर्ने बताए।
‘यस्तो कुरामा सरकार सचेत रहोस् ।’ संसारको कुनै पनि व्यवस्था आफैंमा पूर्ण नहुने भन्दै व्यवस्थाको विकास र परिष्कारको क्रम निरन्तर रहने उनले बताए।
देशको सिमानाका बारेमा संयमित भएर बोल्नु पर्ने बताए । भारतीय प्रधानमन्त्री नरेन्द्र मोदीलाई इंगित गर्दै उनले भने, ‘एक अर्को देशको राष्ट्रियता, अखण्डता र स्वाधीनताको सम्मान हुने गरी अभिव्यक्ति दिनुहोस्।’
नेपालको संसदमा भारतीय प्रधानमन्त्री मोदीले सम्बोधन गरेको स्मरण गर्दै अध्यक्ष नेपालले भने, ‘जसरी गौतम बुद्ध नेपालमा जन्मिएका हुन् भनेर नेपालको संसदमा बोल्नु भयो, नेपाली जनताको मन जित्नु भयो, अब सिमानाका बिषयमा पनि स्पष्ट हुनुहोस्।’
एक अर्को प्रसंगमा अध्यक्ष नेपालले यूवाहरुमा राजनीतिप्रति वितृष्णा सिर्जना हुने गरी भ्रम सिर्जना गरिएको बताउँदै एकीकृत समाजवादीले युवाहरुलाई समेट्दै अगाडि बढीरहेको र जागरण अभियानका क्रममा हजारौ युवाहरुलाई समेटेको बताए। उनले भने, ‘युवाहरु निराश नहुनुहोस्, हामी छौं, जनताको माझमा जाँदा सकारात्मक प्रभाव पाएका छौँ, युवाहरुको आकर्षण बढेको छ,अब निराश हुनु पर्दैन।’
समाजवादी जागरण अभियानका क्रममा २६ असोज, शुक्रबारका दिन कैलाली जिल्लाका लम्की, सुख्खड, अत्तरिया हुँदै धनगढीमा विविध कार्यक्रमको आयोजना गरिने भएको छ ।
उक्त अभियान २७ असोज, शनिबार कञ्चनपुर जिल्लाको पुनर्वास, झलारी हुँदै लालपुर र महेन्द्रनगरसम्म पुग्ने छ। अभियान २८ असोज, आइतबार सुर्खेत सदरमुकाम वीरेन्द्रनगरमा विविध कार्यक्रम सहित समापन हुने भएको छ।
